Г.Занданшатар: Мэдлэг боловсрол, ажлын туршлага таарч байна, яв, зүтгэ гэж намын нөхөд итгэл хүлээлгэсэн учир Ерөнхий сайдад нэр дэвшсэн

Төрийн албыг цомхон, чадварлаг болгоход чиглэж ажиллана.  

Ямар нэршилтэй Засгийн газар байх вэ гэж асууж байна. Монгол Улсын Засгийн газар байх нь ойлгомжтой. Муур хар юм уу цагаан байх нь гол нь биш хамгийн гол нь хулгана барьдаг байх ёстой гэдэг нэг үг бий. Ямар нэршилтэй байх нь чухал бус ард түмний аж амьдралд бодитой үр өгөөч өгсөн, ард түмэнтэй ойр Засгийн газар байх ёстой гэдэг бодолтой байна. Бүтэц бүрэлдэхүүнээ баталж, сайд нараа томилж, анхны хуралдаанаа хийгээд ямар нэршилтэй байхаа танилцуулна.

Яагаад Ерөнхий сайдад нэр дэвших болсон бэ гэдэгт хариулъя. 2019, 2023 онд өөрчлөлт оруулсан Үндсэн хуулийг амьдралд баталгаатай хэрэгжүүлж, хэрэгжилтийг нь амилуулахын тулд нэр дэвшиж байна. Нөгөө талаас цагийн байдал хүнд, улс төрийн нөхцөл зөрчилтэй, гадаад орчин хүнд байгаа үед намын нөхөд итгэл хүлээлгэж байхад ухрах эрх байхгүй гэж бодсон. Тааламжтай үед урагшаа гардаг, хэцүү үед хойшоо суух эрх бидэнд байхгүй. Мерит зарчим, мэдлэг боловсрол, ажлын туршлага таарч байна, яв, зүтгэ гэдэг намын хамт олны итгэлээс хойш суугаагүй.

Л.Оюун-Эрдэнийн Засгийн газрыг богино хугацаанд үр дүнтэй ажилласан гэж бодож байгаа. Хувь хүний хувьд сайн ажилласан гэж дүгнэдэг. Цаашдаа ч эхлүүлсэн ажлууд нь үргэлжлэх ёстой.

УИХ-д суудалтай улс төрийн намуудтай ярилцаагүй. Үндсэн хуулийн дагуу Ерөнхий сайд энэ асуудлыг ярьдаг. Би томилогдоогүй байна. Хэрэв томилогдох юм бол УИХ-д суудалтай намуудтай хамтын ажиллагааны талаар ярилцана. Монгол Улсын эрх ашгийн төлөө хэнтэй ч хамтарч ажиллана. Харин Монгол Улсын эрх ашгийн эсрэг бол хэнтэй ч тэмцэнэ.

Гадаадын хөрөнгө оруулалтын тухай 2012 оны хууль бол тухайн үед Монголын баялаг гадаадад чөлөөтэй зарагдаад тэр нь хэмжээ хязгааргүй байх юм бол Монголоос зөвшөөрөл авдаг тухай агуулгатай хууль байсан. Сонгуулийн жил байсан учраас гишүүдийн попролт болон янз бүрийн шалтгаанаар хуулийн анхны зарчим өөрчлөгдөж батлагдсан. Гэхдээ энэ хууль хэрэгжилтийн шатандаа хэрэгжээгүй. Хоёрдугаарт, энэ хуулийг дараа нь хүчингүй болгосон. Хүчингүй болсон хуулиас болоод өнөөдөр гадаадын хөрөнгө оруулалт буураад байгаа юм байхгүй.