"АНУ-ын виз мэдүүлэгчид өргөдлөө үргэлжлүүлэн гаргаж болно. Консулын хэлтэс бүрэн шалгахын тулд хуваариа байнга тохируулдаг"
Америкийн Нэгдсэн Улс(АНУ) оюутны визийн ярилцлагаа түр зогсоох чиглэлийг өөрийн Элчин Сайдын Яам(ЭСЯ)-дад өгсөн талаар өмнө нь мэдээлсэн.
Үүнтэй холбоотойгоор АНУ-ын ЭСЯ-ны Олон нийттэй харилцах албаны дарга Молик Бэрканаг Анги хэлний мэргэшлийн төвийн нээлтэд оролцох үеэр нь монгол оюутнуудад виз олгох асуудал ямар нөхцөлд байгаа талаар тодрууллаа.
Тэрбээр "Трампын засаг захиргаа улсынхаа болон иргэдийнхээ аюулгүй байдлыг хамгаалахын тулд визний үйл явцаар дамжуулан үндэсний аюулгүй байдал, олон нийтийн аюулгүй байдлын хамгийн өндөр стандартыг баримталж байна.
Визний шийдвэр бүр нь үндэсний аюулгүй байдлын хүрээнд гаргаж буй шийдвэр юм. АНУ-д зорчихоор төлөвлөж буй хүн бүр агентлаг хоорондын аюулгүй байдлын шалгалтаар ордог. АНУ-ын үндэсний аюулгүй байдал эсвэл олон нийтийн аюулгүй байдалд заналхийлж болзошгүй хүмүүсийг АНУ-д нэвтрэхийг хориглох нь АНУ-ын иргэдийг хамгаалахад чухал ач холбогдолтой.
Төрийн департаментын цагаачлалын бус визний ярилцлагын цаг товлолт нь динамик чанартай. ЭСЯ эсвэл консулын хэлтсийн хүчин чадал нь тухайн газар байгаа өргөдлүүдийг хуулийн дагуу бүрэн шийдвэрлэхэд шаардагдах хугацаанд үндэслэдэг бөгөөд энэ нь АНУ-д аюулгүй байдал, эрсдэл учруулахгүй байхыг баталгаажуулахад чиглэдэг.
Виз мэдүүлэгчид өргөдлөө үргэлжлүүлэн гаргаж болно. Консулын хэлтэс өргөдөл бүрийг бүрэн шалгах хангалттай хугацаа гаргахын тулд хуваарьдаа байнга тохируулга хийж байгаа" гэж хариуллаа.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
