Гэрэл зургийг MPA агентлагийн онцгой зөвшөөрөлтэйгөөр ашиглав

Жил бүрийн 3-р сарын 14 буюу Pi тооны өдрийг дэлхийн өнцөг булан бүрд сурагчид тэсэн ядан хүлээж байдаг. Учир нь энэ өдөр дэлхийд тэргүүлэгч  их сургууль Массачусетсийн Технологийн Институтэд (MIT) өргөдөл гаргасан сурагчид тэнцсэн эсэх хариугаа авдаг билээ. Тус сургуульд элсэхийг хүссэн сурагчдын дунджаар 4 хувь нь л тэнцэж чаддаг байна. 

Энэ оны хувьд Сант сургуулийн 12 дугаар ангийн сурагч Г.Азжаргал баяртай мэдээ хүлээн авч, MIT-д тэнцэж чадсан байна. Ингэснээр тэрээр Сант сургуулиас MIT-д тэнцсэн 10 дахь сурагч боллоо. Бид түүнтэй уулзаж ярилцлаа.

- Баяр хүргэе. MIT-д тэнцэж орсон мэдрэмжээсээ хуваалцана уу. Догдлол дүүрэн, хүлээлт өндөртэй байсан уу?

- Баярлалаа. Миний хувьд  тэнцэхгүй байсан ч зүгээр, даваад гарч чадна гэж бодоод сэтгэл зүйгээ нэлээн бэлдчихсэн байлаа. Харин тэнцсэнээ мэдээд бөөн баяр болсон. Шууд л ээж рүүгээ гүйж очоод баяртай мэдээгээ хуваалцсан даа. Сэтгэл санаа амар амгалан болсон мэдрэмж төрж байлаа.

- Их сургуульд элсэх өргөдлөө хэзээ гаргаж эхэлсэн бэ. Дараа жил элсэхээр бодож байгаа сурагчдад туршлагаасаа хуваалцана уу?

- Анх 9-р ангиасаа эхлээд их сургуульд элсэхдээ бэлдэж эхэлсэн гэж хэлж болно. Олон улсын олимпиадад оролцож медаль авах юм бол энэ нь дэлхийн топ сургуульд ороход дэмжлэг болно гэж үзэж бэлтгэлээ хийдэг байсан. MIT-д элсэх өргөдлөө өнгөрсөн оны 8-р сараас эхлүүлсэн байгаа. Харин SAT, TOEFL өгөх бэлтгэлээ 11 дүгээр ангид орох намраасаа эхлүүлсэн юм байна.

 

Массачусетсийн Технологийн Институтын кампус. Зургийн эх сурвалж: www.science.org

- MIT-г яагаад сонгож суралцахаар шийдсэн бэ. Элсэхэд маш хүнд энэ сургууль чиний юуг давуу тал гэж үзэж элсүүлсэн гэж бодож байна?

- Миний сонгож суралцах гэж буй мэргэжил маань мэдээллийн технологи, хиймэл оюун ухааны чиглэл учраас энэ чиглэлдээ хамгийн шилдэг сургууль MIT-г сонгосон. Сургуульд элсэхэд маш олон зүйлийг авч үздэг ч миний давуу тал гэвэл олон улсын олимпиадад гаргасан амжилтууд юм болов уу. Анх би 10-р ангидаа олон улсын физикийн олимпиадад яваад хүрэл медаль, 11-р ангидаа мөнгөн медаль авч байсан нь нөлөөлсөн байх.

 

Гэрэл зургийг MPA агентлагийн онцгой зөвшөөрөлтэйгөөр ашиглав

- Чиний хувьд Сант сургуулиас MIT-д элссэн 10 дахь сурагч болж байна. Яагаад Сантынхан дэлхийн топ их сургуулиудад ингэж амжилттай элсдэг гэж бодож байна?

- Нэг дурсамжаа хуваалцмаар байна. Би Сант сургуульд 1 дүгээр ангиасаа суралцсан. 2-р ангид байхдаа аавтайгаа машинаар явж байхад манай аав танай сургуулийн Цэрэнчимэг гэдэг хүүхэд MIT-д тэнцсэн байна гэж хэлж байсан. Тэр үед анх энэ сургуулийн тухай сонсоод ирээдүйд сурах мөрөөдөлтэй болж байлаа. Сант сургуулийн сурагчид өмнө нь дэлхийн шилдэг сургуульд тэнцсэн сурагчидтайгаа холбоо харилцаа сайтай байж, ах эгч нар нь байнга тусалж дэмжиж, зөвлөгөө өгдөг нь нөлөөлдөг байх. Би өөрөөсөө 2 дээд үеийн төгсөлтийн Анирчулуу эгч болон өмнөх төгсөлтийн Энэрэлтээс зөвлөгөө авч өргөдлөө гаргахдаа бэлдсэн байгаа. 

- Сант сургуулийн AP (Advanced Placement) хөтөлбөрт хамрагдаж байсан уу. Энэ нь хэр давуу тал болдог вэ?

- AP хөтөлбөрийн хүрээнд 11-р ангидаа Calculus BC болон Computer Science A хичээлүүд авч байсан. Энэ нь сургуульд тэнцэхэд давуу тал болсон гэж үзэж байна. Сургуулиас нэмэлтээр хичээл судлах боломжийг олгосныг ашигласнаараа их сургуульдаа өөрт олдсон бүх боломжийг бүрэн дүүрэн ашиглаж чаддаг гэдгийг харуулж чадсан байх.

“Тэтгэлгийн багцад сургалтын төлбөр, дотуур байр, хоолны төлбөр багтсан”

- Их сургуульд элсэхэд англи хэлний чадвар өндөр байх ёстой. Хэлээ яаж сайжруулсан бэ?

- Хэлээ нэг зун сургалтад явах, гадагшаа явчхаад ирэх зэргээр хүчлэх биш өөр аргаар буюу өдөр тутамдаа дуртай зүйлээ хийх замаар байнга хэрэглэж суралцсан. Тухайлбал Ковидын хөл хорионы үеэр англи хэл дээр маш их контент үзэж, юм уншдаг байсан нь хэл сайжрахад нөлөөлсөн гэж бодож байна.

- Сургуулиасаа тэтгэлэг авсан уу?

- Тэтгэлгийн өргөдлөө сургуулийн өргөдөлтэйгөө зэрэг гаргадаг. Миний хувьд тэтгэлэг авахаар өргөдөл гаргаж, эцэг эхийнхээ санхүүгийн баримтуудыг илгээсэн. Миний өргөдлийг хянаж үзээд 100% тэтгэлэг олгох шийдвэр гаргасан байна лээ. Тэтгэлгийн багцад сургалтын төлбөр, дотуур байр, хоолны төлбөрийг 100% төлөх орж байгаа. Жилийн 91 мянган ам.долларын тэтгэлэг авсан байгаа.

“IT болон хиймэл оюуны чиглэлээр топ боловсрол эзэмшинэ”

 

Гэрэл зургийг MPA агентлагийн онцгой зөвшөөрөлтэйгөөр ашиглав

- Хиймэл оюун ухааны чиглэлээр мэргэжил эзэмших сонирхолтой байгаа юм байна. Яагаад энэ чиглэлийг сонирхож байгаа вэ. Их сургуульдаа очоод ямар чиглэлийн багш нартай уулзаж, юу хийх төлөвлөгөөтэй байна?

- Манай аав мэдээлэл технологийн салбарын хүн. Миний хувьд багаасаа энэ салбарыг сонирхож, 5-6 дугаар ангиасаа код бичээд сурчихсан байсан. Физикээр хичээллэснээр юмсын утгыг илүү ойлгож, судалдаг бол мэдээлэл технологийн хичээлээр шинэ зүйл хийж бүтээдэг. Би шинэ зүйл бүтээх дуртай учраас IT чиглэлээ түлхүү сонирхож байгаа. Их сургуульд ороод IT болон хиймэл оюуны чиглэлээр топ боловсрол эзэмшинэ. Мөн очоод үе тэнгийнхээ, салбартаа тэргүүлэгч хүүхдүүдтэй танилцаж, харилцааны цар хүрээгээ тэлж, цаашид бизнес эрхлэх чиглэлээр олон боломж эрэлхийлнэ гэж төлөвлөж байна.

- Олимпиадад бэлдэхээс гадна чөлөөт цагаараа юу хийдэг вэ. Нэг өдрөө яаж өнгөрүүлдгээ хуваалцаж болох уу?

- Математик, физик, мэдээлэл зүйн олимпиадад бэлддэг байсан учраас өдөрт 5-6 цагийг олимпиадын бэлтгэлдээ зарцуулдаг. Ганцаараа сууж, төвлөрч хичээлээ хийх дуртай. Чөлөөт цаг гарах үедээ волейболын бэлтгэлд явдаг. Энэ жилийн хувьд төгсөх анги учраас найзуудтайгаа илүү их цагийг өнгөрөөж, гоё дурсамж бүтээхийг эрмэлзэж байгаа.

- Ярилцсанд баярлалаа. Сурлагын өндөр амжилт хүсье!

- Баярлалаа

 

Гэрэл зургийг MPA агентлагийн онцгой зөвшөөрөлтэйгөөр ашиглав