23 дахь жилдээ зохиогдох гэж буй плэйтайм наадам энэ жил тайз, дуугаралтын чанартаа шинэчлэл хийхээс гадна олон улсын жишигт нийцсэн тасалбарын шинэлэг технологийг нэвтрүүлэхээр болжээ. Энэ талаар болон бусад мэдээллийг хүргэхээр наадмын зохион байгуулагчид өнөөдөр мэдээлэл хийлээ. 

Нийслэлийн эдийн засагт ₮15 тэрбумын нэмүү өртөг бий болгоно 

• 3,000 түр ажлын байрыг бий болгоно
• 200 гаруй аж ахуй нэгжтэй хамтарна
• Өдөрт дунжаар 30,000 үзэгч ирэх тооцоололтой байгаагаас 20,000 гаруй нь гадаад үзэгч байх ба түлхүү Хятад, Орос, Солонгос, Япон улсын үзэгчид ирнэ
• Нийслэлийн эдийн засагт 15 тэрбум төгрөгийн нэмүү өртөг бий болохоор тооцоолсон
• Нийт найман тайз, асарт 130 хамтлаг, уран бүтээлчид оролцох ба үүнээс 40 гадаад хамтлаг, уран бүтээлчид байна. Нийтдээ 600 орчим уран бүтээлчид оролцоно

Тайз хоорондын дууны давхцал, чимээний бохирдлыг бууруулна

Наадмын тайз, дуугаралтын чанарт шинэчлэлт хийх зорилгоор энэ жил Европын нэр хүндтэй фестивалиудад олон жил ажилласан туршлагатай Нидерланд улсын мэргэжлийн дууны системийн инженертэй хамтарч ажиллахаар болсон байна. Ингэснээр тайз хоорондын дууны давхцал, чимээний бохирдлыг бууруулах чиглэлээр олон улсын стандарт нэвтэрч байгаагаараа онцлог болох аж. 

 

Гэрэл зургийг MPA агентлагийн онцгой зөвшөөрөлтэйгөөр ашиглав

Хүн бүр тасалбараа өөрийн хувийн мэдээллээр баталгаажуулж орсноор тасалбарын залилан байхгүй болно 

Энэ жил үзэгчдийн аюулгүй, түргэн нэвтрэх нөхцөлийг бүрдүүлэх зорилгоор олон улсын жишигт нийцсэн тасалбар баталгаажуулалтын системийг нэвтрүүлж байгаа ба энэхүү систем нь хуурамч тасалбарын эрсдэлийг бууруулж, үзэгчдийн мэдээллийн нууцлалыг найдвартай хамгаална гэдгийг зохион байгуулагчид онцлов. 

Тодруулбал тасалбар худалдан авах үед мэдээлэл баталгаажуулах QR код болон тасалбар идэвхжүүлэх линк ирэх ба тусгай идэвхжүүлэх кодоо оруулаад хувийн мэдээллээ бөглөн баталгаажуулах юм байна. Улмаар баталгаажуулсан QR код үүсэж фестивальд нэвтрэх үед QR-н дагуу хувийн мэдээллээ шалгуулан орох аж. 

Үүний үр дүнд тасалбарын залилан байхгүй болох давуу талтайгаас гадна идэвхэжсэн QR кодоо хүнд дамжуулж болох боломжтой болж байгаа юм байна. 

Бүх төлбөр тооцоогоо карт, бэлэн мөнгөөр биш NFC технологит  бугуйвчаар хийнэ 

Түүнчлэн энэ жил "Cashless" төлбөрийн тогтолцоо буюу фестивалийн үеэр үзэгчид бүх төлбөр тооцоогоо карт, бэлэн мөнгөөр биш NFC технологит  бугуйвчаараа хийх боломжтой болж байгаа юм байна. 
Уг системийн үр дүнд хүмүүс ямар хоол, уух зүйлсийг түлхүү авч байна зэрэг дараа жилүүдэд сайжруулж болох дата цугларахаас гадна түргэн, хялбар аюулгүй гүйлгээ хийх боломж бүрдэж байгаа аж. 

Мөн борлуулалт хийж буй байгууллагууд түрээсээр бус олсон орлогынхоо хэмжээгээр мөнгө төлөх боломжтой болжээ. 

Өндөр чанартай хөгжмийн хөтөлбөртэй байна 

Плэйтайм фестиваль нь альтернатив инди рок болон электроник хөгжмийн хосолсон хөгжмийн хөтөлбөртэй гэдгээрээ онцлог юм. Энэ жил дэлхийн underground electronic-н томоохон төлөөлөгчид ирэхээс гадна Ази, Америк, Европоос амьд хөгжмийн тэргүүлэх хамтлагууд ирэх аж. 

Плэйтайм фестиваль нь олонд танигдсан уран бүтээлчдээс илүү маш чанартай дуу хөгжмийг хүргэдэг уран бүтээлчдийг оролцуулдаг учир энэ жил ч мөн адил өндөр чанартай хөгжмийн хөтөлбөртэй байна. Учир нь фестивалийн гол зорилго нь хөгжим мөнгө бол хоёрдогч гэдгийг онцлов.

Түүнчлэн Налайх дүүрэг дэх "Плэйтайм  хүрээлэн рүү нийслэлээс энэ жил засмал зам  болон эрчим хүчний холболт хийж байгаа юм байна.