Монгол, Хятадын улсын хилийг гурав дахь удаа хамтран шалгах бэлтгэлээ хангахаар санал солилцжээ

ГХЯ

Монгол, Хятадын хилийн хамтарсан комиссын VI хуралдааныг 2025 оны зургаадугаар сарын 10, 11-ний өдрүүдэд Улаанбаатар хотноо зохион байгуулж байна.

Энэхүү хуралдаан нь “Монгол, Хятадын хилийн дэглэмийн тухай Монгол Улсын Засгийн газар, Бүгд Найрамдах Хятад Ард Улсын Засгийн газар хоорондын гэрээ”-ний хэрэгжилтийг хангадаг хамтын ажиллагааны механизм билээ.

Тус хуралдаанд монгол талын төлөөлөгчдийг Гадаад харилцааны яамны Гэрээ, эрх зүйн газрын захирал Ж.Соёлмаа, хятадын талын төлөөлөгчдийг Гадаад хэргийн яамны Хил, далайн хэргийн газрын Элчин зөвлөх Сун Хунлянь нар ахлан оролцож байна.

Энэ удаагийн хуралдаанд төлөөлөгчдийн бүрэлдэхүүнд хил хамгаалах байгууллага, гаалийн байгууллага, боомтын захиргаа, усны газар, ойн газар, орон нутгийн төлөөлөл багтаж, Засгийн газар хоорондын гэрээгээр зохицуулдаг олон асуудлаар санал солилцлоо.

Хилийн хамтарсан комиссын хуралдаанаар дараах асуудлын хүрээнд санал солилцож, нэгдсэн тохиролцоонд хүрэв.

Үүнд:

• Хил орчмын нутаг дэвсгэрийн хилийн хяналт, хууль сахиулах хамтын ажиллагааны тухай;
• Монгол, Хятадын улсын хилийг гурав дахь удаа хамтран шалгах бэлтгэл ажлыг хангах тухай;
• Хилийн бүс нутгийн ой болон бэлчээрийн түймрээс урьдчилан сэргийлэх тухай;
• Хилийн ус болох Хэрлэн гол, Шарилжийн голын тухай;
• Шинэ төрлийн хил дамнасан байгууламж болох 5G, AGV зэрэг ухаалаг олон төрөлт тээврийн тухай;
• Бичигт-Зүүнхатавч авто замын боомтын шинэ гарц, Хавирга-Архашаат авто замын боомтын ачаа тээврийн шинэ гарц, Замын-Үүд-Эрээний эдийн засгийн хамтын ажиллагааны бүсийн хил дамнасан байгууламжийн хилийн шугам дайран гарах цэгийг тохирох асуудлын тухай тус тус санал солилцов.

Монгол, Хятадын хилийн хамтарсан комиссын VII хуралдааныг 2026 онд хятадын талд зохион байгуулахаар Талууд тохиролцов гэж Гадаад Харилцааны Яамнаас мэдээллээ.

 

ГХЯ