Украины дүрвэгч сүмоч болсон түүх

Аонишики Арата. Энэ нэрийг сүмо сонирхогчид мэддэг болоод багагүй хугацаа өнгөрлөө. Түүний жинхэнэ нэр нь Данило Явгушин. Тэрбээр 2004 онд Украины Винница мужийн төвд төрсөн юм.

Дайны хөлөөс дүрвэж 2022 оны дөрөвдүгээр сард Японд хөл тавьсан Данило харь орны соёл, хэлний талаар ямар ч ойлголтгүй байлаа.

Энэ сарын 23-нд 21 нас хүрсэн украин эр багаасаа бөхийн олон төрлөөр хичээллэж байв. Сонирхогчдын сүмогоор долоон настайгаасаа суралцаж, 2019 онд Залуучуудын Дэлхийн Аварга Шалгаруулах Тэмцээн (ДАШТ)-ээс хүрэл медаль хүртсэн. Тус тэмцээнд Кансай Их Сургуулийн сүмогийн багийн ахлагч Арата Яманакатай танилцсан нь хожим түүнийг Японд ирэх шалтгаан болжээ.

Явгушин ахлах сургуулиа төгсөөд Украины Үндэсний Их Сургуульд суралцах урилга авсан ч удалгүй дайн эхэлснээр эх орноо орхих шийдвэр гаргасан байна. 

Эхлээд Германы дүрвэгчдийн хотхонд очихоор төлөвлөж байсан ч Арата Яманакагийн ятгалгаар Японд ирсэн юм.

Шинэ гэр бүл нь түүнийг Даня гэж дуудна. Шинэ улсад ирээд ахлах сургуулийн сурагч болсон Даня Кансай Их Сургуулийн сүмогийн клубт үргэлжлүүлэн бэлтгэлээ базааж байв. 

Энд байхдаа л барилдах авьяас нь тодорч, олны анхаарлыг татах болсон шинэ залууг Ажигава ояката анхааралдаа авчээ. Түүнийг монголчууд Аминишики нэрээр нь сайн таних болов уу. Тэрбээр 2023 оны долдугаар сарын тэмцээнээс өмнө Ажигава дэвжээнд бэлтгэлээ базаах болж, ажиллах эрхийн зөвшөөрөл нь гарсны дараа буюу тэр жилийнхээ есдүгээр сараас мэргэжлийн сүмод барилдаж эхэлсэн юм.

Тэрбээр дэвжээний нэрээ авахдаа Японд ирэхэд нь тусалсан найз Арата Яманакагийн нэрийг авч, Аонишики Арата болжээ. Аонишикигийн эхний ханз нь цэнхэр гэсэн утгатай бөгөөд үүгээр Украины далбааг бэлгэдсэн байна. 

 

Мэргэжлийн сүмод элссэн цагаас хойш түүний амжилт гэрлийн хурдаар өссөн. 

2023 оны арваннэгдүгээр сар болон 2024 оны нэгдүгээр сард жонокүчи болон жонидан зиндаанд дараалан түрүүлжээ. Санданмэ зиндаанд эхний зургаан барилдаандаа ялснаар түүний ялалтын цувралд 20 хүрлээ. Гэвч сүүлийн өдөр Кисе дэвжээний Нагамүрад ялагдсанаар мэргэжлийн сүмод анх удаа унасан ч макүшита руу дэвших болзлоо хангасан юм.

Макүшитад гурван тэмцээн дараалан 6:1 амжилт үзүүлснээр 2024 оны арваннэгдүгээр сараас жюүрёо зиндаанд хүч үзэх боллоо. Ингэснээр Аминишики ояката болсноос хойш анхны цолтой шавь, Украинаас Шиши буюу Сергей Соколовьскийгийн дараа цолтой бөх болсон хоёр дахь сүмоч болов.

Түүнчлэн 1958 оноос хойш жилд зургаан башё зохион байгуулах болсон өнөөгийн системд хамгийн богино хугацаанд цолтой бөх болсон тав дахь сүмоч юм.

Жюүрёо зиндаанд хоёр тэмцээний дараа макүчид дэвшсэн Аонишики эхний тэмцээнээ 11 даваа 4 унаагаар амжилттай өндөрлүүлсэн. Түүний амжилтыг үнэлж, канто-шё буюу дайчин барилдааны тусгай шагналыг олгосон билээ.

Шиши болон Аонишикигийн амжилт украинчуудыг Японд дүрвэхэд итгэл найдвар нь болж буй юм. ОХУ-ын дайралт эхэлсэн цагаас хойш тус улсад 2,700 орчим украинчууд орогнол хүссэн. Японы Засгийн Газраас тэдний олонход буюу 2,000 орчим иргэнд ажиллах эрхийн зөвшөөрөл өгөөд байна.

Дүрвэгчдийн амьжиргааны болон бусад зардлыг гаргадаг Ниппон сангаас өнгөрсөн онд хийсэн судалгаагаар дээрх иргэдийн 39 хувь нь Японд аль болох удаан амьдрах хүсэлтэй байгаа бол 34 хувь нь нөхцөл байдал тогтворжсоны дараа эх орондоо буцах хүсэлтэйгээ илэрхийлжээ.