Лука Модрич клубийн дэлхийн аваргын дараа "Реал Мадрид"-ыг орхино

Испанийн "Реал Мадрид" клубийн ахлагч Лука Модрич энэ зун болох клубийн Дэлхийн Аварга Шалгаруулах Тэмцээн (ДАШТ)-ий дараа багаа орхино гэдгээ мэдэгдлээ.

Өдгөө 39 настай хорват хагас хамгаалагч, 2018 оны шилдэг хөлбөмбөгчинд олгодог Баллон д'Орын эзэн Л.Модрич энэ Бямба гарагт Ла Лигийн хүрээнд сүүлийн тоглолтоо "Реал Сосьядад"-ын эсрэг хийхээр төлөвлөжээ.

Тэрбээр 2012 онд Английн "Тоттенхэм" клубээс Испанийн Эзэн хааны багийн тоглогч болсон юм.

Энэ зун болох клубийн ДАШТ-д Испанийн клуб хэсгийн шатанд Саудын Арабын "Аль Хилаль", Мексикийн "Пачука", Австрийн "Зальцбург" багтай нэг хэсэгт орсон билээ.

Л.Модричийн хувьд энэ улиралд 34 тоглолтод оролцохдоо 2 гоол, 6 дамжуулалт гүйцэтгэжээ. Тэрбээр өнгөрсөн жил гэрээгээ нэг жилээр сунгасан нь энэ зун дуусаж буй.

Хорват эр "Реал Мадрид"-ын төлөө 590 тоглолтод оролцохдоо 43 гоол, 95 дамжуулалт хийсэн юм. 13 улирлын эцэст 28 цом авсныг нь онцолбол Аваргуудын лигийн цомыг 6, Клубийн ДАШТ-д 6, Европын Супер цомд 5, Испанийн Ла Лигт 4, Испанийн цомд 2, Испанийн Супер цомд 5 түрүүлсэн байна.

2018 онд "Реал Мадрид" багийнхаа хамт Аваргуудын лигт түрүүлсний дараа Хорватын шигшээ багаа ДАШТ-ий шигшээд шалгаруулсан амжилтыг нь үнэлж оны шилдэг хөлбөмбөгчнөөр тодруулсан. 

Түүнчлэн 39 нас, 116 хоногтойдоо "Валенсиа"-гийн хаалгыг мялааснаар Испанийн клубийн түүхэнд хамгийн ахмад насандаа гоолдсон тоглогч болж байв.

Эх сурвалж: BBC