Э.Одонтуяа: Сэлбэ дэд төвд 4,362 айлын орон сууц барих компанитай ирэх долоо хоногт гэрээ байгуулна

Сэлбэ дэд төвийн эхний хоёр багцын орон сууц барих тендерт 14 компани саналаа ирүүлээд буй. Эдгээрээс шалгарсан компанитай ирэх долоо хоногт гэрээгээ байгуулж, ажлаа эхлэхээр болжээ.

Энэ тухай өнөөдөр болсон хуралдааны үеэр НИТХ-ын төлөөлөгч Э.Одонтуяа "Сэлбэ дэд төв төслийн ажил энэ оны нэгдүгээр сараас эхэлсэн. Тус төвд орон сууц барих хоёр багц тендерийг гуравдугаар сарын 7-нд зарласан юм. Гүйцэтгэгч компанитай ирэх долоо хоногт гэрээ байгуулахаар бэлдсэн байгаа. Тухайн төсөл 158 га газрыг хамарна. 2,206 нэгж талбартай.

Нэгдүгээр багц 3.8 га, хоёрдугаар багц 17 га, гуравдугаар багц 27 га, дөрөвдүгээр багц 16 га талбайд орон сууц баригдана.

Сэлбэ дэд төвийн талбайд нийт 39 ажил гүйцэтгэхээс хөрсний ус зайлуулах шугамыг суурилуулах ажлыг ирэх долоо хоногт эхлэхэд бэлэн болсон.

Тус бүр 240 хүүхдийн таван цэцэрлэг, 1,500, 960, 1,200 хүүхэд хүлээн авах сургууль барих зураг төсөлтэй" гэж танилцууллаа.

Тэрбээр тендерт шалгарсан компанийн нэрийг дурдсангүй.

Сэлбэ дэд төвд нийт 10,063 айлын 113 блок орон сууц барихаас 4,362 айлын орон сууц барих барилгын ажлын гүйцэтгэгчийг шалгаруулах хоёр багц тендерийг зарласан бөгөөд нэгдүгээр багцын төсөвт өртөг 373.6 тэрбум төгрөг бол хоёрдугаар багцынх 453.4 тэрбум төгрөг, нийт ₮826 тэрбумын төсөвтэй. Эдгээр санхүүжилтийг орон нутгийн төсвийн хөрөнгөөс гаргахаар болоод буй.

Нэгдүгээр багцад:

1. БНХАУ-ын "Sinohydro Есдүгээр товчоо инженеринг" компани 475.6 тэрбум төгрөг, хөнгөлөлтгүй, тендерийн баталгаагүй
2. "Шандонг Хайнинг констракшн" групп 373.4 тэрбум төгрөг, тендерийн баталгаатай
3. "CSMC" 373.2 тэрбум төгрөг, тендерийн баталгаатай
4. "China Construction 6th Engineering" групп 368.8 тэрбум төгрөг, тендерийн баталгаатай
5. "Changda Municipal Engineering Guangdong" Co.Ltd 362.4 тэрбум төгрөг, үнийн хөнгөлөлт 3.99% буюу 14.4 тэрбум төгрөг. Үнийн хөнгөлөлт хасагдаж, 347.9 тэрбум болсон. Тендерийн баталгаатай
6. "Shanghai Baoye Group" 361.6 тэрбум төгрөг, тендерийн баталгаатай
7. "China Road and Bridge Corporation" 359.3 тэрбум төгрөг, тендерийн баталгаатай
8. "Хуашан интернэшнл энжинеринг монголиа лимитэд" ХХК 349.6 тэрбум төгрөг, тендерийн баталгаатай.
9. "China Tiesiju Civil Engineering Group" Co., Ltd тендерийн баталгаатай, 344.7 тэрбум төгрөгөөр орон сууцыг барих саналуудаа ирүүлжээ.

Хоёрдугаар багцад:

1. PowerChina Construction Group Ltd 552.5 тэрбум төгрөг, тендерийн баталгаа харагдаагүй.
2. Shandong Luqiao Group Co,Ltd 453.4 тэрбум төгрөг, үүнээс үнийн хөнгөлөлт 18.5 тэрбум төгрөг, хоёр тэрбум төгрөгийн тендерийн баталгаатай
3. China Construction Third Engineering Bureau Co., Ltd 448.6 тэрбум төгрөг, 2.2 тэрбум төгрөгийн тендерийн баталгаатай
4. Shanghai Baoye Group Corp,Ltd 441.6 тэрбум төгрөг, 2.2 тэрбум төгрөгийн тендерийн баталгаатай
5. Changda Municipal Engineering Guangdong Co.Ltd 439.8 тэрбум төгрөг, 2.2 тэрбум төгрөгийн тендерийн баталгаатай
6. China First Highway Engineering Company Limited 424.1 тэрбум төгрөг, 2.2 тэрбум төгрөгийн тендерийн баталгааг гаргаж, саналаа ирүүлсэн билээ.