ХУУЧИРСАН МЭДЭЭ: 2025/05/23-НД НИЙТЛЭГДСЭН

Цахим залилан Фэйсбүүкээс гадна Инстаграм, Телеграм, Тик Токоор өргөн тархаж байгааг АНХААРУУЛАВ

П.Сайнжаргал, IKON.MN
2025 оны 5 сарын 23
iKon.MN
Зураг зураг
Гэрэл зургийг MPA агентлагийн онцгой зөвшөөрөлтэйгөөр ашиглав

Цахим орчинд үйлдэгдсэн гэмт хэргийн 85.5 хувийг залилах гэмт хэрэг эзэлж байгааг Цагдаагийн Ерөнхий Газар (ЦЕГ)-аас сэрэмжлүүллээ. 

Энэ оны эхний дөрвөн сард улсын хэмжээнд нийт 18,605 гэмт хэрэг бүртгэгдсэн байна. Үүнээс

  • Улаанбаатар хотод 13,119 (70.5%)
  • Орон нутагт 5,483 (29.5%) гэмт хэрэг гарчээ. 

Нийт бүртгэгдсэн 18,605 гэмт хэргийн 30.9 хувийг залилах гэмт хэрэг эзэлж байгаа юм. Харин цахим орчинд үйлдэгдсэн гэмт хэргийн 3,745 буюу 85.5 хувь нь залилах гэмт хэрэг эзэлж байна.

Он гарснаас хойш Телеграм аппликэйшнээр дамжуулан эд хөрөнгөө бусдад залилуулсны улмаас иргэдэд нийт 7.3 тэрбум төгрөгийн хохирол учирсан.

Цагдаагийн байгууллагаас энэ төрлийн гэмт хэрэгтэй тэмцэх чиглэлээр Монголын банкуудын холбоотой иргэдэд учирсан нийт 5.7 тэрбум төгрөгийн хохирлын шилжилт хөдөлгөөнд хязгаарлалт тогтоосон.

Цахим орчинд үйлдэгдэж байгаа залилах гэмт хэргийн дийлэнх буюу бараа үйлчилгээ захиалах, даалгавар биелүүлэх (телеграм) зэрэг үйлдлийн аргаар бусдыг залилсан байна.

Цахим залилан нь ихэвчлэн Фэйсбүүкээр явагддаг байсан бол одоо нэмэгдэж Инстаграм, Телеграм, Тик Токоор өргөн тархсан. Хохирогчид нь санаанд оромгүй байдлаар мөнгө хөрөнгө, цаг хугацаа, сэтгэл санаагаар хохирч залилуулах нь зөвхөн мөнгөөр хэмжигдэхгүй.

Сүүлийн өдрүүдэд иргэд гар утсанд "Телеграм аппликэйшн сайт дээр таны зураг байна" гэж таны таньдаг хүний нэр, зурагтай хаягаас бичиж, хуурамч линк явуулж байгаа нь иргэд, олон нийтийг төөрөгдөлд оруулан зургаа харах гэж линкээр нэвтэрч, нууц үгээ алдах тохиолдлууд гарч байгаа. Иймд ямар нэгэн ач холбогдолгүй линкээр орж нууц үгээ оруулахгүй байхад анхаарна уу.

Өнөө үед хуурамч сайт, хуурамч дуудлага, мөн хиймэл оюун ухаан тусламжтайгаар өргөн хүрээтэй тархаж, иргэд, байгууллагад ихээхэн хохирол учруулж байна.

Иймд өөрийгөө цахим залилангаас хамгаалахын тулд дараах зөвлөмжүүдийг мөрдөхийг цагдаагийн байгууллагаас сэрэмжлүүлж байна.

Залиланд өртөхөөс сэргийлэх зөвлөмж: 

  • Цахим нууц үгээ хэцүү, давтагдаагүй нууц үг хэрэглэх
  • Таны утсанд ирсэн сэжигтэй имэйл, линк, мессэжийг нээхгүй байх
  • Танихгүй гадаад кодтой дуудлага, мессэжээс сэрэмжлэх
  • Цахим халдлагад өртсөнөө мэдвэл нэн даруй банк руу залгаж карт дансаа хаалгах, цагдаагийн байгууллагад мэдэгдэхийг анхаарууллаа.