Гольфын домогт тамирчин Тайгер Вүүдс ерөнхийлөгч Трампын бэр асантай дотно харилцаатай болсноо зарлав

Бүх цаг үеийн хамгийн шилдэг гольфчдын нэг гэгддэг Тайгер Вүүдс ерөнхийлөгч Трампын экс бэр Ванесса Трамптай дотно харилцаатай болсноо өчигдөр зарлажээ.

Сүүлийн өдрүүдэд тэдний харилцааны тухай цуурхал олон нийтийн анхаарлын төв байсан нь ийнхүү баталгаажиж байна.

Вүүдс өөрийн 6.4 сая дагагчтай сошиал хуудсанд Ванессатай хамт байгаагаа харуулсан гэрэл зургуудыг нийтлээд үлдсэн амьдралаа хамт өнгөрүүлэх хүсэлтэй байгаагаа илэрхийлжээ.

Ванесса нь ерөнхийлөгч Дональд Трампын ууган хүү Дональд Трамп Жуниортой 2005-2018 онуудад хамт амьдрахдаа таван хүүхэд төрүүлж байв.

Тэдний 17 настай ууган охин Кай Трамп одоо гольфоор хичээллэдэг бөгөөд Вүүдсийн хоёр хүүхэдтэй нэг сургуульд сурдаг юм.

Хувийн амьдралаа ихэд нууцалдаг Вүүдс харилцаагаа ингэж ил болгосон нь ховор сонин үзэгдэл болж байна.

2013 онд тэр АНУ-ын уулын цанын нэрт тамирчин Линдси Воннтой дотно харилцаатай болсноо ингэж зарлаж байжээ.

Тухайн үед Вүүдс, Вонн нар араас нь мөрдөж байсан папарацци нарын ажлыг ач холбогдолгүй болгохын тулд ингэснээ тайлбарлаж байсан юм.

Тайгер Вүүдс өмнө нь Элин Нордегрентэй гэрлэж, хоёр хүүхэдтэй болсон ч гэр бүлээс гадуур харилцаа нь илэрсний дараа 2010 онд түүнээс салж байв.

Хамгийн сүүлд тэр Эрика Херман хэмээх эмэгтэйтэй долоон жил харилцаатай байсны эцэст 2022 оны аравдугаар сард салсан юм.

Тайгер Вүүдсийн хувьд ерөнхийлөгч Дональд Трамптай хэд хэдэн удаа гольф тоглож байв. 2019 онд АНУ-ын ерөнхийлөгчийн  эрх чөлөөний одонг тэр Трампаас гардан авч байжээ.

Энэ оны хоёрдугаар сард Вүүдс гольфын спортыг хөгжүүлэх асуудлаар Цагаан ордонд Трамптай уулзсан юм.

Тайгер Вүүдс нь спортын салбараас төрсөн цөөхөн тэрбумтны нэг бөгөөд хөрөнгийн хэмжээг нь Форбс сэтгүүл $1.3 тэрбум гэж тооцоолж байжээ.

Эх сурвалж: CNN