Өмнөд Солонгос улс үрчлүүлэх нэрээр “хүүхэд экспортолж” байсныг хараат бус хорооны шалгалтын үр дүн харуулав

Солонгосын дайны дараа буюу 1950-аад оноос хойш Өмнөд Солонгосын эрх баригчид олон жилийн турш гадаадын гэр бүлүүдэд хүүхэд үрчлүүлэх хөтөлбөр хэрэгжүүлж байсан юм.

Уг хөтөлбөрийг хэрэгжүүлэхдээ засгийн газар хүний эрх зөрчсөн эсэхийг мөрдөн шалгах ажлыг 2022 онд эхлүүлсэн хараат бус Үнэн ба Эвлэрлийн Хороо өчигдөр дүгнэлтээ нийтэд танилцуулжээ.

Хорооны дарга Пак Сун Ён танилцуулах хэвлэлийн хурлын үеэр “Энэ бол манай түүхийн ичгүүртэй хэсэг. Үрчлэгдсэн олон хүн хайраар дүүрэн гэр бүлд өсөх азтай байсан бол бусад нь үрчлүүлэх үйл ажиллагааг алдаатай буруу явуулсны улмаас маш их зовлон зүдгүүр туулсан байна. Олон хүний зовлон өнөөдөр ч үргэлжилсээр байна” гэж хэлсэн юм.

Хөтөлбөрийн хүрээнд доод тал нь 170,000 хүүхдийг ихэвчлэн Өрнөдийн орнуудын иргэдэд үрчлүүлж байжээ.

Ингэхдээ засгийн газар үрчлүүлэх үйл ажиллагааг хувийн зуучлагч байгууллагуудад даатгаж, хяналтгүй орхисноос хүний эрх ноцтой зөрчигдөж, ашгийн хойноос хөөсөн бизнес болон хувирсан байна.

Мөрдлөг явуулсан хугацаанд 1964-1999 оны хооронд үрчлэгдсэн 367 хүнээс шалгуулах хүсэлт хүлээн авчээ.

Эдгээрээс 100 хүсэлтийг бүрэн шалгаж, 56 нь хүний эрхийн зөрчилтэй үрчлэгдсэнийг тогтоосон байна.

Үлдсэн хүсэлтүүдийг шалгасан дүгнэлтээ тус хороо энэ оны тавдугаар сард багтаан танилцуулахаар төлөвлөжээ.

Солонгосын дайны дараа Өмнөд Солонгос нь дэлхийн хамгийн ядуу орнуудын нэг болж байв.

Тухайн үед тус улсын засгийн газар хүүхэд үрчлүүлэх хуулийг батлахдаа зохион байгуулалтын ноцтой алдаа гаргаж, хувийн зуучлагчдад хэт их эрх мэдэл өгснөөс хүний эрх зөрчигдөх үүдийг нээсэн тухай тайланд дурджээ.

Тухайлбал зуучлагч байгууллагуудад сар бүр үрчлүүлэх хүүхдийн тоо хэмжээг өгдөг байсан ч ямар нэг төлбөр хураамж тогтоож өгөөгүй байна.

Ингэснээр зуучлагчид гадаадын иргэдээс авах хураамж, хандивыг өөрсдийн дураар тогтоож, мөнгө олох арга хэрэгсэл болгон хувиргажээ.

Мөн хүүхдийг үрчлүүлэхдээ эхээс нь зохих зөвшөөрөл аваагүй, хүүхдийг өнчин, эсвэл хаягдсан болгож харагдуулахын тулд ар гэрийнхнийх нь мэдээллийг санаатай гуйвуулж өөрчилсөн, үрчилж авах гадаад гэр бүлийг нь сайн судлаагүй зэрэг зөрчлүүд илэрсэн байна.

Үүний улмаас гадаадад үрчлэгдсэн олон хүн өнөөдөр төрсөн эцэг эхээ олж уулзах боломжгүй болоод байгаа юм.

Мөрдөн шалгах хорооны тайланд Өмнөд Солонгосын засгийн газарт үрчлүүлсэн иргэдээсээ албан ёсоор уучлал гуйж, цаашдын хүүхэд үрчлүүлэхтэй холбоотой хууль тогтоомждоо олон улсын стандарт нэвтрүүлэхийг зөвлөжээ.

Тус улсын эрх баригчид сүүлийн жилүүдэд хүүхэд үрчлүүлэх асуудалд нэлээд анхаарал хандуулах болсон. 2023 онд батлагдсан шинэ хуулиар гадаадын иргэдэд хүүхэд үрчлүүлэх асуудлыг засгийн газар ямар нэг дундын зуучлагчаар дамжуулалгүй, өөрөө бүрэн хариуцахаар болсон юм.

Үнэн ба Эвлэрлийн Хорооны дүгнэлтийн талаар Өмнөд Солонгосын засгийн газар одоогоор ямар нэг байр суурь илэрхийлээгүй байна.

Эх сурвалж: BBC