XIV Лео нэрийг сонгосон шалтгаанаа Ромын шинэ пап хиймэл оюуны технологийн хувьсгалтай холбон тайлбарлажээ

Энэ долоо хоногт Ромын католик сүм хийдийн шинэ тэргүүнээр тодорсон XIV Лео өчигдөр өөрийг нь сонгосон кардиналуудад цаашид мөрдөж ажиллах үзэл баримтлалаа танилцуулжээ.

АНУ-ын уугуул Роберт Превост уламжлалын дагуу XIV Лео хэмээх нэрийг өөрийн номын нэрээр сонгосон юм.

Тэрбээр хиймэл оюуны технологийг хүн төрөлхтний өмнө тулгарч буй гол сорилт гэж үздэг тул энэ нэрийг сонгосноо тайлбарлажээ.

Энэ нэрийг зүүж байсан өмнөх пап XIII Лео аж үйлдвэржилтийн хувьсгалын эхэн үед буюу 1878-1903 онуудад Ватиканд залрахдаа ажилчдын эрх, түүнд үзүүлэх капитализмын нөлөө зэргийг ихээхэн сонирхдог байсан юм байна.

“Аж үйлдвэржилтийн бас нэг шинэ хувьсгал болох хиймэл оюуны технологи хөгжиж, энэ нь хүмүүний нэр төр, шударга ёс, хөдөлмөр хамгаалалд шинэ сорилтууд бий болгож буй энэ үед манай сүм хийд нийгмийн үнэт сургаалаа бүгдэд түгээх ёстой” гэж шинэ пап айлджээ.

Түүний өмнөх пап Францис засаглалынхаа сүүлийн жилүүдэд хиймэл оюуны технологийн хүн төрөлхтөнд учруулж болзошгүй аюулын талаар нэлээд хөнддөг болсон бөгөөд үүнийг зохицуулах олон улсын гэрээ байгуулахыг уриалж байсан юм.

Тиймээс шинэ пап өмнөх папынхаа бодлого, үйл ажиллагааг үргэлжлүүлэх төлөвлөгөөтэй байгаа бололтой.

Францис агсан ч түүнийг өөрийн залгамжлагчаар бэлдэж байсан гэдэг.

АНУ-ын Чикаго хотод төрсөн Превост сүүлийн 20 гаруй жил Өмнөд Америкийн Перу улсад ажиллаж амьдарсан хүн юм.

Жирийн номлогчоос эхлээд Перугийн нэгэн жижиг хотын сүмийн хамба болох хүртлээ дэвшиж байсан түүнийг Францис 2023 онд Ватиканд татаж, дэлхий дахины хамба нарын шалгаруулалтыг хариуцдаг чухал албан тушаалд томилж байжээ.

Папыг сонгох кардиналуудын чуулганыг маш нууц байдалд, гадаад ертөнцөөс тусгаарлагдсан орчинд зохион байгуулдаг.

Пүрэв гарагт болсон нууц сонгуулиар 133 кардиналын 100 нь Превостыг Ромын католик сүм хийдийн 267 дахь тэргүүнээр сонгосныг Мадагаскарын кардинал Десире Царахазана өчигдөр сэтгүүлчдэд анх удаа мэдээлсэн байна.

Кардиналуудын гуравны хоёроос дээш хувийн саналаар шинэ папыг сонгодог юм.

Эх сурвалж: Associated Press