Гэрэл зургийг MPA агентлагийн онцгой зөвшөөрөлтэйгөөр ашиглав

Монгол Улсад хүний их эмч мэргэжлээр Канад, Солонгос, Лаосын 10 оюутан суралцаж, Анагаахын Шинжлэх Ухааны Үндэсний Их Сургууль (АШУҮИС)-ийг амжилттай төгсөж байна. 

Тэдний төгсөлтийн баяр дээр очиж, АШУҮИС-ийн Хүний их эмчийн дөрөвдүгээр курсийн төгсөгч Ким Жиминээс дараах тодруулгыг авснаа хүргэе. 

-Монгол Улсыг зорин ирж, АШУҮИС-ийг сонгон суралцах болсон шалтгааны талаар яриагаа эхлэх үү?

-Сайн байна уу. Уншигчдад энэ өдрийн мэндийг хүргэе. 

Би өмнө нь АНУ-д Эм зүйн ухааны сургуулийг төгссөн. Сургуулиа төгссөний дараа мэргэжлээ илүү гүнзгийрүүлэх сонирхолтой байсан учраас олон судалгаа хийж, мэдээлэл хайж байлаа. 

Улмаар Монголын АШУҮИС-ийн Хүний их эмчийн хөтөлбөр 100 хувь англи хэлээр хичээллэх мэдээллийг олж авсан.

Англи хэлний мэдлэгээ сайжруулан, анагаахын мэргэжлээ гүнзгийрүүлэн судлах боломжтой гэж харсан учраас Анагаахын Шинжлэх Ухааны Үндэсний Их Сургуульд элсэн суралцахаар сонгосон.

Нийт дөрвөн жил суралцаад хүний их эмч мэргэжлийн дипломоо өнөөдөр гардан авлаа.

-Ямар ямар орны оюутнуудтай хамт суралцах боломж тохиосон бэ?

-Канад, Япон, Монгол, Лаос зэрэг орны оюутнуудтай хамт суралцах боломж тохиосонд баяртай байна. Надтай хамт гадаадын есөн оюутан хүний их эмч мэргэжлээр төгсөж байгаа. 

"Цаашид илүү сайн суралцах ёстой"

 

Гэрэл зургийг MPA агентлагийн онцгой зөвшөөрөлтэйгөөр ашиглав

-Хичээлийн хөтөлбөр, багш нарын чадвар ямар санагдсан бэ?

-Багш нар маань хичээлийг маш ойлгомжтой сайн заасан. Хүний амь насыг авран хамгаалж, хүнийг эмчлэх хүндтэй үүргийг ухамсарлуулсан. 

Мэдэхгүй, чадахгүй зүйл тохиолдвол нэг бүрчлэн маш нарийн зааж зөвлөсөн багш нартаа баярлалаа. 

Манай багш нарын мэргэжлийн мэдлэг, чадвар болон хэлний чадал маш өндөр. Биднийг маш сайн боловсон хүчин, хүнлэг энэрэнгүй хүн болоход нөлөөлсөн эрхэм хүмүүс. 

-Сургуулиа төгсөөд хаана ажиллахаар төлөвлөж байгаа вэ?

-Одоогоор тодорхой шийдээгүй байгаа. Монгол, Солонгос, Америк гурван улсдаа эмчийн шалгалтаа өгөх төлөвлөгөөтэй байна. Цаашид илүү сайн суралцах ёстой. 

-Сурлага, хөдөлмөрт нь амжилт хүсье.