Гэрэл зургийг MPA агентлагийн онцгой зөвшөөрөлтэйгөөр ашиглав

Олон улсын хүүхдийн эрхийг хамгаалах өдрийг угтан олон хүүхэд төрүүлж өсгөсөн ээжүүдэд Ерөнхийлөгчийн зарлигаар Алдарт эхийн одон гардуулдаг уламжлалтай. 

Энэ жил 14,480 ээж уг одонг хүртэж байгаа юм. Тэдний нэг нь Монгол Улсын хоёр сая дахь иргэн Л.Хосбаяр. 

Тэрбээр сэтгэгдлээ хуваалцахдаа "Маш сайхан байна. Энэ хорвоод төрүүлж өсгөсөн ээждээ баярлалаа. Одон авахдаа Ерөнхийлөгчийн хэлж байгаа үгийг сонсоод их догдолж, сэтгэл их хөдөлсөн. Өнөөдөр одонгоо авч байгаа ээжүүддээ баяр хүргэж, аз жаргал хүсье.

Хүүхэд бүхэн, ээж бүхэн дандаа аз жаргалтай байж, нүднээс гарах нулимс нь зөвхөн аз жаргалынх байгаасай гэж хүсэж байна" хэмээлээ. 

"Ээжүүдийг алдаршуулан хүндэтгэж байгаад үнэхээр их сэтгэл хөдөлж байна"

 

Гэрэл зургийг MPA агентлагийн онцгой зөвшөөрөлтэйгөөр ашиглав

Түүнчлэн цахиур.мн сайтын Ерөнхий эрхлэгч Ц.Анхзул өнөөдөр "Алдарт эх" болж байна.

Тэрбээр "Эмэгтэй хүн болж төрсний, эх хүн болсны, дөрвөн сайхан үр хүүхэдтэй болсны бахархам сайхан өдөр тохиож байна. Өмнө нь одон авч буй ээж нарыг хажуугаас нь хараад л хоолой зангираад байдаг байсан. Өнөөдөр өөрөө авах их сайхан байна. Төр засаг, Ерөнхийлөгч маань Монгол Улсынхаа хүн амыг өсгөх, ирээдүйн үр хүүхдүүдийг зөв сайхан хүн болгохын тулд гэр бүлийг дэмжиж, ээжүүдийг алдаршуулан хүндэтгэж байгаад үнэхээр их сэтгэл хөдөлж байна.

Энэ жил одон авч буй бүх ээждээ баяр хүргэе. Монголын бүх гэр бүлүүдэд аз жаргал сайн сайхын бүхнийг хүсье. Гэр бүл, үр хүүхдээ санаа амар үлдээгээд ажлаа хийх боломжийг олгож байгаа хүн бол хань маань. Ханьдаа маш их баярлалаа. Хоёулангийнх нь одон шүү гэж хэлье. Биднийг үргэлж дэмжиж, тусалж байгаа ээж аав, хамт олон, найз нөхдөдөө, салбарынхандаа, мэдээлэл хүлээж авдаг хүн бүхэнд баярлалаа" гэлээ.