"Шүүмжлэлийг гэрээ зөрчлөө гэж харж байгаа нам бол энэ улс оронд дуугүй байх дарангуйллыг бодитоор тогтоосон гэсэн үг"
Монгол Ардын Нам(МАН)-ын Бага хурал өчигдөр болж, Ардчилсан Нам(АН)-ыг гэрээгээ зөрчсөн гэх үндэслэлээр хамтарсан Засгийн газраас гаргахаар шийдвэрлэсэн.
Энэ талаар Улсын Их Хурал(УИХ)-ын гишүүн Х.Тэмүүжингээс сэтгүүлчид байр суурийг нь тодруулав.
Хууль зүй, дотоод хэргийн сайд асан, УИХ-ын гишүүн Х.Тэмүүжин "АН гэрээнд дурдсан бүх зүйлийг хариуцлагатайгаар биелүүлсэн. Том төслүүдийг гацаанаас гаргах, УИХ дээр кноп дарахад хамгийн хариуцлагатай ирээд хуралд суугаад асуудлыг дэмжээд явсан нь АН-ынхан. Асуудал хариуцсан АН-ын сайд нар ажил дээрээ зүгээр суугаагүй. Энэ богинохон хугацаанд байдаг бүх хүчээрээ л ажилласан. Гэрээ зөрчсөн гэдэг бол бодитой дүгнэлт биш байх.
МАН шүүмжлэл сонсож огт сураагүй. Ажил хийхэд шүүмжлэл байнга гардаг. АН бол дотроо ч асуудлаа ил тод ярьж, шүүмжилдэг нам. Өөрийнхөө намын дарга бүү хэл, өрөөлийн Ерөнхий сайдыг ч шүүмжлээд, алдаа дутагдал байвал хариуцлага тооц гэж шаарддаг нам. Цөөн бус гишүүн ийм яриа зөндөө гаргасныг та бүхэн анзаарсан байх. Гарын үсэг зурсан нь гурав байгаа болов уу.
Шүүмжлэлийг гэрээ зөрчлөө гэж харж байгаа нам бол бодитоор энэ улс оронд дуугүй байх дарангуйллыг тогтоосон гэсэн үг" гэв.
- Ерөнхий сайдын хүүгийн тансаглалтай холбоотой асуудал танай намын хариуцлагын асуудал болж хувирсныг юу гэж харж байна вэ?
- МАН дандаа л ийм юм хийдэг шдээ. Угаасаа зальжин. Ямар нэг сөрөг мэдээлэл гарч ирээд, эсвэл ямар нэг шавар шавхай наалдаад ирэхээр өрөөлд наачхаад, өөрсдөө цагаан болоод цаашаа гүйгээд байдаг. Логикийг нь жирийн эрүүл саруул ухаантай хүн бол ойлгохгүй. Байгалийн тэнэгдүүхэн хүн бол дагаад алга таших байх. Тийм л нам.
- Ерөнхийлөгчийн сонгуулийг угтаж ийм нүүдэл хийж байна гэж үзэж байна уу?
- Магадгүй. Нэг бус гишүүний амнаас та бүхэн нэг сонсож байгаа байх, өнөөдөр болж буй үйл явц ардаа Үндсэн хуулийн өөрчлөлт болон Ерөнхийлөгчийн сонгуулийг угтсан, би сүүлийн 15 жил "Чөтгөрийн суудал" гэдэг үгийг хэлж байгаа. Тэр суудалд очсон хүн бүр эрх мэдэлд яагаад ийм дуртай болдог юм бол, яагаад өөрийгөө алх, бусдыг хадаас гэж хараад бүгдийг дээрээс балбах гэж оролддог юм бол. Тэгээд зогсоогүй, энэ эрх мэдлээ сунгах гэж оролддог, энэ эрх мэдэл дээрээ өөрийгөө хадах гэж оролддог. АН-аас байна уу, МАН-аас байна уу ялгаагүй Ерөнхийлөгч болсон хүн бүрийн ард үүсдэг эрх мэдлийн төлөөх адын шунал байна. Энэ шунал битгий амилаасай гэж хүсэж байна.
- Дараагийн Засгийн газарт МАН дангаараа гэхээс илүүтэй УИХ дахь жижиг намуудаас оруулах сонирхол байна гэж харагдсан. Энэ хэр боломжтой вэ?
- Боломжтой. 2027 онд УИХ-д суудалтай намууд нэр дэвшүүлнэ. Нэр дэвшүүлэлтэд энэ намуудаас хэн байхаас үл шалтгаалан санал хуваах, хэн нэгнийг гүтгэн харлуулах, хажуугаас нь хавираг руу бүлэх, "түгжил" гэдэг ажлыг нь хийх хэмжээний нөхөрлөл МАН-д хэрэгтэй.
- Талбай дээр "Огцрох амархан" гээд ес дэх өдрөө жагсаж байгаа залуусын жагсаалын үнэ цэн МАН-ын бага хурлын шийдвэртэй холбоотойгоор юу болж хувирав, та юу гэж бодож байна вэ?
- Тэд байнга залуучуудын итгэл найдвар, тэдний үгээр гараа угаадаг. Өнөөдөр гараа угаагаад л дуусаж байгаа байх.
- Хамтарсан Засгийн газар байгуулагдахад та шүүмжлэлтэй хандаж байсан. АН-ыг хамтарсан засгаас гаргах шийдвэр гарвал та дэмжих үү?
- Тийм шийдвэр гарвал таатай хүлээж авна гэдгээ би хэд хоногийн өмнө хэлсэн. Засаг зоригтой бөгөөд өөрчлөлт хийж чадахгүй гэдэг нь тодорхой болж байна.
- Засгийн гадна талд АН яаж ажиллах вэ?
- Хүчтэй сөрөг хүчин байхын тулд дор хаяж гурван зүйл хийх ёстой.
- Ерөнхий сайдыг доош нь буулгах ёстой. Л.Оюун-Эрдэнэ байна уу, дараагийн Ерөнхий сайд нь хэн байхаас үл шалтгаалан Ерөнхий сайд бол УИХ-ын толгойд сууж болохгүй. Засгийн газрын байр суурь гишүүдийн асуултад дээрээс, хурал даргалагчийн нүдээр харж, загнаж болохгүй. Ерөнхий сайд байтугай Ерөнхийлөгч УИХ-д ажлаа тайлагнан танилцуулах үүрэгтэй. Иймд УИХ нь УИХ шиг байхын тулд сандал суудлын асуудлыг шийдэх ёстой.
- Мэтгэлцээний парламент болохын тулд Ерөнхий сайдын мэдээллийн цагийг УИХ-ын асуулгын цаг болгон өөрчлөөд Ерөнхий сайд, Засгийн газар пропаганда хийдэг сэдвээрээ УИХ-д орж ирж тоглодог биш, гишүүд улс оронд тулгамдсан асуудлыг Ерөнхий сайд, Засгийн газраас асуудаг тэр чигт орох ёстой.
- Хамгийн чухал нь Ерөнхий сайд байна уу, Засгийн газрын гишүүн байна уу, Ерөнхийлөгч байна уу, хэн байхаас үл шалтгаалан УИХ-д худал ярьдаггүй байх хэрэгтэй.
Энэ гурвыг хийж чадвал парламент парламент шиг болно байх.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
Баярлалаа
|
51 СЭТГЭГДЭЛТЭЙ
|
