"Таван шар-Офицер чиглэлийн автобус Зүүн дөрвөн замаас Багшийн дээд хүртэл 2-3 цаг түгжирсэн үед богино эргэлтийн зохицуулалт хийдэг"
Улаанбаатар хотын нийтийн тээврийн автобусны чиглэлийг зохицуулахдаа замын хөдөлгөөний нягтаршлыг үндэслэдэг байна.
Энэ тухай Нийтийн тээврийн бодлогын газрын тээвэр зохицуулагч А.Энхжаргал "Улаанбаатар хотод тухайн өдрийн цаг агаарын байдал, үйл явдлаас шалтгаалж замын хөдөлгөөний ачаалал янз бүр байдаг. Тухайлбал цастай өдөр байлаа гэхэд тухайн чиглэлийн автобус цагийн хуваарийн дагуу үйлчилгээ үзүүлэхэд хүндрэлтэй болдог.
Нийтийн тээврийн автобусны чиглэлийн зохицуулалтыг хоорондын цаг, зайг Удирдлагын төвөөр дамжуулан хянасны үндсэн дээр хийдэг. Жишээлбэл М1: "Таван шар-Офицер" чиглэлийн автобус оройдоо Зүүн дөрвөн замаас Багшийн их сургууль хүртэлх зогсоолуудад 2-3 цаг түгжирдэг. Энэ үед буюу автобусны хоорондын цаг, зай их гарсан үед богино эргэлтийн автобус явуулах зохицуулалт хийдэг" гэж тайлбарлав.
М:1A “Таван шар-Мөнгөн завъяа”, М:1Б “Сүхбаатарын талбай-Офицеруудын ордон” чиглэлийг богино эргэлттэй болгожээ. Үндсэн чиглэл болох М:1 “Таван шар-Офицеруудын ордон” чиглэлийн автобуснууд иргэдэд хэвээр үйлчилж байгаа билээ.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
Баярлалаа
|
16 СЭТГЭГДЭЛТЭЙ
|
