Өмнөд Солонгосын түүхэнд гарсан хамгийн том ой хээрийн түймрийн улмаас 24 хүний амь үрэгдээд байна

Өмнөд Солонгосын зүүн өмнөд бүс нутагт үргэлжлэн шатаж буй ой хээрийн түймрийн улмаас амиа алдсан хүний тоо өчигдрийн байдлаар 24 хүрчээ.

Хохирогчдын ихэнх нь 60-аас дээш насны ахмадууд байгааг эрх баригчид мэдээлсэн байна.

Үүнээс гадна 26 хүн түлэгдсэний 12-ынх нь биеийн байдал хүнд байгаа ажээ. Нийтдээ 23,000 гаруй хүнийг орон гэрээс нь нүүлгэн шилжүүлсэн байна.

Тус улсын ерөнхийлөгчийн үүрэг гүйцэтгэгч Хан Дук Су энэхүү гамшгийг “манай улсын түүхэнд урьд өмнө тэмдэглэгдэж байгаагүй хамгийн аймшигтай ой хээрийн түймэр” гэж тодорхойлжээ.

Уисон хотод оршдог 1,300 жилийн настай сүм түймэрт бүрэн шатсан байна. Үндэсний соёлын үнэт өвд тооцогддог Буддын шашны сүмийг галд автахаас өмнө дотор нь хадгалагдаж байсан түүх дурсгалын эд зүйлсийг аюулгүй газарт шилжүүлжээ.

Энэ удаагийн гал түймэр өнгөрсөн долоо хоногийн Баасан гарагт Санчон дүүргийн нутгаас эхэлсэн юм. Хүчтэй хуурай салхи түймрийн цар хүрээг Уисон, Гёнбук, Андон, Чонсон, Ёнгян зэрэг зэргэлдээ дүүргүүдэд тэлсэн байна.

Мягмар гарагт Өмнөд Солонгосын гал түймэртэй тэмцэх үндэсний агентлаг гамшгийн онц байдлын зэрэглэлийг хамгийн дээд түвшинд нь хүргэжээ.

Өчигдөр буюу Лхагва гарагт Уисон дүүргийн ууланд гал сөнөөгч нисдэг тэрэг осолдсоны улмаас нисгэгч нь амиа алдсан байна.

Албаныхан одоо уг ослын шалтгааныг тогтоохоор ажиллаж байгаа ажээ.

Гал түймрийг унтраах ажиллагаанд олон мянган гал сөнөөгч, 5,000 орчим цэргийн алба хаагч оролцож, Өмнөд Солонгост байрладаг АНУ-ын цэргийн баазын нисдэг тэрэгнүүдийг дайчилсан байна.

Чийглэг уур амьсгалтай Өмнөд Солонгост ой хээрийн түймэр харьцангуй ховор гардаг.

Энэ удаагийн түймэрт 17,000 гектар ой мод шатаад байгаа нь тус улсын түүхэнд гарч байгаагүй том талбай хамарсан гамшиг юм.

Эх сурвалж: BBC