Мьянмарт болсон газар хөдлөлтийн улмаас 144 хүн амиа алдаад байна

Өчигдөр буюу Баасан гарагт Мьянмар улсын төв хэсэгт 7.7 магнитудын хүчтэй газар хөдөлж, асар их хохирол учруулаад байна.

Уг гамшиг хөрш Тайланд болон Хятадын баруун өмнөд бүс нутагт бас нөлөөлсөн юм.

Одоогоор амиа алдсан хүний тоо 144 хүрч, олон зуун хүн бэртэж, гэмтсэнийг Мьянмарын эрх баригчид мэдээлж байна. Гэхдээ хохирлын хэмжээг бүрэн тогтоож чадаагүй байгаа тул энэ тоо цаашдаа өсөх нь тодорхой юм.

 

Газар хөдлөлтийн төв цэг Мьянмарын баруун хойд бүсийн Сагайн хотоос өмнө зүгт 18 км орчим зайд байжээ.

Тус улсын хоёр дахь том хот болох 1.5 сая оршин суугчтай Мандалай эндээс холгүй оршдог юм.

Нийслэл Най Пи Тау хот эндээс өмнө зүгт 100 км орчим зайтай оршдог.

Эхний газар хөдлөлт орон нутгийн цагаар 12:50 цагт болсон бол 12 минутын дараа 6.4 магнитудын хүчтэй хоёр дахь хөдлөлт бүртгэгджээ.

Хөрш Тайланд улсын нийслэл Бангкок хотод баригдаж байсан өндөр барилга нурсны улмаас зургаан хүн амиа алдаж, 100 орчим ажилчин сураггүй болоод байна.

Бангкок хотын барилгын дээвэр дээр оршдог усан сангийн ус цалгиж, доош асгарснаас газар хөдлөлтийн чичиргээ энд ямар хэмжээнд мэдрэгдсэнийг харж болохоор байна.

2021 онд цэргийн дэглэм тогтсон Мьянмарт яг юу болсон талаар мэдээлэл олж авахад хэцүү байна.

Цэргийнхэн одоо тус улсын бүх хэвлэл мэдээллийн хэрэгслийг хянаж байгаа бөгөөд гадаадын сэтгүүлчдийг ч нэвтрүүлэхээ больсон юм.

Мьянмарт болсон газар хөдлөлт нэлээд хүчтэйд тооцогдож байна. 8.0 магнитудаас дээш хүчтэй газар хөдлөлтийн төв цэгт оршдог хот суурин бүрэн сүйрдэг гэж үздэг.

2004 оны арванхоёрдугаар сарын 26-ны өдөр түүхэнд тэмдэглэгдсэн хамгийн хүчтэй газар хөдлөлтүүдийн нэг Индонезын эрэгт тохиоход 228,000 орчим хүний амь үрэгдэж байв. Энэ газар хөдлөлтийн хүчийг 9.1 магнитуд байсан гэдэг.

Үүнээс илүү хүчтэй газар хөдлөлт түүхэнд нэг л бүртгэгдсэн байдаг нь 1960 онд Чилид болсон 9.5 магнитудын хүчтэй хөдлөлт юм.

Эх сурвалж: BBC