Дэлхийн хамгийн нарийн ажиллагаатай бугуйн цагийг Швейцарт танилцуулжээ

Мягмар гарагт Швейцарт нээгдсэн “Watches and Wonders” үзэсгэлэн худалдааны үеэр Vacheron Constantin компани дэлхийн хамгийн нарийн ажиллагаатай механик цагийг бүтээснээ танилцуулжээ.

Цаг үйлдвэрлэлийн салбарт Григорийн хуанли харуулах, сарны хэлбэрийг харуулах зэрэг стандарт үзүүлэлтүүдээс давсан аливаа чадварыг “нарийн төвөгтэй” механизм ангилалд оруулдаг.

Тэгвэл Vacheron Constantin компанийн “Les Cabinotiers Solaria Ultra Grand Complication” нэртэй шинэ цаг нь 41 ийм нэмэлт механизмыг багтааснаараа дэлхийн дээд амжилтыг тогтоож байгаа юм байна.

Үйлдвэрлэгч нь одоо шинэ бүтээлдээ ашигласан 13 механизмын патентыг авахаар ажиллаж байгаагийн долоо нь дуу чимээтэй холбоотой гэнэ.

Шинэ цаг нь ердийн 24 цагийн тооллоос гадна оддын цаг (sidereal time), нарны цагийг (solar day) давхар харуулдаг юм байна.

Мөн нарны тэнгэр дэх байрлалыг харуулдаг, гурван цаг тутамд хэдэн цаг болж байгааг алхны чимээгээр мэдээлэх механизмтай бүтээжээ.

 

Эдгээрээс гадна нарны байрлал, өндөр, зам, дэлхийн экватортой харьцуулсан өнцөг зэргийг харуулж, эргэдэг нүүр нь оддын 13 орд тус бүр хэзээ харагдахыг заадаг юм байна.

Vacheron Constantin энэ цагаа сүүлийн найман жилийн турш зохион бүтээсэн гэнэ. Цагны гадаад хэсгийг 18 каратын цагаан алтаар бүрж, 200 гаруй эрдэнийн чулуугаар чимжээ.

1755 онд үүсгэн байгуулагдаж, одоо тансаг эдлэлийн Richemont группийн харьяанд байдаг Vacheron Constantin бас дэлхийн хамгийн нарийн ажиллагаатай халаасны цаг бүтээсэн дээд амжилтыг эзэмшдэг юм.

Өнгөрсөн онд танилцуулж байсан Berkley Grand Complication халаасны цаг нь Хятадын хуанлийг харуулах зэрэг нийт 63 нарийн механизмаас бүрддэг байна.

Гэхдээ халаасны цагны диаметр нь бугуйн цагныхаас доод тал нь хоёр дахин их хэмжээтэй байдаг тул 22 механизм илүү багтаажээ.

Эх сурвалж: CNN