МОНАДА: Үндэсний бөхийн аймаг, сумын цолтой 12 тамирчнаас допингийн төрлийн бодис илэрсэн

Гэрэл зургийг MPA агентлагийн онцгой зөвшөөрөлтэйгөөр ашиглав

Монголын Допингийн Эсрэг Үндэсний Байгууллага (МОНАДА) холбогдох дүрэм журамд заасны дагуу үндэсний бөхийн 104 тамирчнаас допингийн хяналтын зорилгоор тэмцээний болон бус үеийн шинжилгээ авч Дэлхийн Допингийн Эсрэг Агентлагийн итгэмжлэгдсэн ХБНГУ, БНСУ, Швейцар улсын лабораторид хүргүүлэн шинжлүүлсэн байна. 

Ингэхэд Д.Отгонбаяр, Д.Оргилох, Г.Мөнхбаяр, А.Баяртогтох, Г.Пүрэвбаатар, Ч.Бямбадорж, Б.Ганзолбоо, Б.Бадамдорж, Э.Мөнхболд, Б.Цэрэнсумъяа, Б.Хаш-Эрдэнэ, Б.Буяндорж нараас допингийн төрлийн бодис илэрч, доорх арга хэмжээг авчээ. 

Харин Б.Лхагварагчаагаас аналитикийн бус зөрчил илэрсэн бөгөөд үр дүнгийн удирдлага дуусаагүй байгаа аж. Дархан аварга Н.Батсуурь, улсын арслан Б.Орхонбаяр тэргүүтэй 11 бөхөөс гуравдугаар сарын 27, 28 болон энэ сарын 1, 2-нд авсан шинжилгээний хариу хараахан гараагүй байна. 

 

 

Допингийн эсрэг үндэсний дүрмийн дагуу Монголын Допингийн Эсрэг Үндэсний Байгууллага нь допингийн шинжилгээний үр дүн, зөрчил, авсан арга хэмжээний талаар олон нийтэд мэдээлэх үүрэгтэй тул мэдээлж байна. Үүнд:

• Шинжилгээний үр дүн
• Допингийн зөрчил гаргасан тамирчин болон холбогдох этгээдийн мэдээлэл
• Илэрсэн хориглосон бодис, хориотой арга
• Тухайн тамирчинд оноосон шийтгэл болон түр түдгэлзүүлэлт хийсэн талаар

Допингийн шинжилгээнд зөрчил илэрсэн тамирчдад дүрмийн дагуу дараах эрхийг ханган ажиллаж байна. Үүнд:

• Лабораторийн шинжилгээний хуудас, А сорьцын баримт бичгийн багцыг нэмэлтээр авах
• В сорьцыг шинжлүүлэх
• Тайлбар өгөх
• Допингийн Эсрэг Үндэсний Дүрмийн хүрээнд хамтран ажиллах нөхцөлийг бүрдүүлэх

Монгол Улсад допингийн эсрэг олон улсын жишигт нийцсэн хяналт, шалгалтыг хэрэгжүүлж, үндэсний бөхийн нэр хүндийг хамгаалах, шударга өрсөлдөөнийг дэмжих бодлогыг баримтлан ажиллаж байна. Допингийн эсрэг хяналт, үр дүнгийн талаарх мэдээллийг олон нийтэд тухай бүрд нь хүргэн ажиллах болно.

Эх сурвалж: Монголын Допингийн Эсрэг Үндэсний Байгууллага