Менингококкт халдварын улмаас нас барсан тохиолдлуудын 60-70% нь 24 цагаас дээш буюу оройтож эмнэлэгт хандсан байжээ
Улсын хэмжээнд энэ онд менингококкт халдварын дөрвөн тохиолдол, хоёр нас баралт бүртгэгдсэн талаар Халдварт өвчний судлал /ХӨСҮТ/-өөс мэдээллээ.
Сүүлийн 10 жилийн хөдлөл зүйгээс харахад жилд дунджаар энэхүү халдварын ойролцоогоор найман тохиолдол, хоёр нас баралт бүртгэгддэг байна.
Менингококкт халдварын тохиолдол бүх насныханд бүртгэгдэж байгаа ч нийт өвчлөлийн 80-85 орчим хувь нь 0-4 настай хүүхд байгаа аж. Өвчлөгсдийн 77% нь гэртээ, 15% нь цэцэрлэгт, 8% нь сургуульд хамрагддаг хүүхдүүдийн дунд бүртгэгдсэн байна.
Тус өвчлөл хоёрдугаар сараас дөрөвдүгээр саруудад харьцангуй өндөр бүртгэгддэг зүй тогтол ажиглагджээ.
Нас барсан тохиолдолд хийсэн судалгаагаар эрүүл мэндийн байгууллагад 60-70% нь 24 цагаас дээш болсон хугацааны дараа буюу оройтож хандаж байгаа шалтгаан голлож байгаа юм байна.
Сүүлийн 20 жилийн менингококкт халдварын байдлаас харахад 5-6 жилийн зайтай хүн амын дунд дэгдэлтийг үүсгэж байгаа аж. Хамгийн сүүлд 2019 онд 20 тохиолдол бүртгэгдсэн байна.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
Баярлалаа
