АНУ-ын зах зээлд ТикТокийг хориглох хугацааг Трамп дахин 75 хоногоор хойшлууллаа

Хятадын компанийн эзэмшдэг ТикТок сошиал платформын үйл ажиллагааг АНУ-ын зах зээлд хориглох хугацааг дахин 75 хоногоор хойшлуулах шийдвэрийг ерөнхийлөгч Дональд Трамп өчигдөр гаргажээ.

2024 онд АНУ-ын Конгресс тус платформын эзэмшлийг Хятадын компаниас Америкийн компанид шилжүүлээгүй тохиолдолд үйл ажиллагааг нь хориглох хуулийг баталж байв.

Нэгдүгээр сарын 20-ны өдөр Трамп тангараг өргөснийхөө дараахан уг хоригийн хугацааг 75 хоногоор хойшлуулах захирамж гаргасан нь өнөөдөр дуусаж байгаа юм.

Өнгөрсөн хугацаанд ТикТокийг авах сонирхолтой компани хараахан гарч ирээгүй байна.

“Манай засаг захиргаа ТикТокийг аврах гэрээг байгуулахаар шаргуу ажиллаж, томоохон ахиц дэвшил гаргаад байна. Гэрээ байгуулахад олон талын дэмжлэг шаардлагатай тул ажил үргэлжлэх болно. ТикТок болон Хятадын талтай тохиролцоонд хүрнэ гэдэгт найдаж байна” гэж Трамп сошиал хуудсандаа бичжээ.

АНУ-ын эрх баригчид ТикТокийн одоогийн эзэмшигч ByteDance компани иргэдийнх нь мэдээллийг Хятадын засгийн газарт дамжуулж болзошгүй гэсэн үндэслэлээр эзэмшлийг нь солихыг шаардаж байгаа.

Трампын засаг захиргаа ТикТокийн хятад бус хувь эзэмшигчийн эзэмшлийн хэмжээг өсгөж, Хятадын талын эзэмшлийг 20 хүрэхгүй хувьд хүргэх зорилготой ажиллаж байгаа гэсэн мэдээлэл бий.

Гэхдээ Лхагва гарагт Трамп худалдааны дайн зарласны дараа ТикТокийн яриа хэлэлцээ зогссон тухай хэд хэдэн эх сурвалж мэдээлж байна.

ТикТок нь одоо АНУ-ын зах зээлд 170 сая орчим буюу тус улсын хүн амын бараг талтай тэнцэх тооны хэрэглэгчтэй болоод байгаа юм.

Эх сурвалж: Reuters