Э.Тамир: Тавантолгой төмөр зам ХХК муурны хоол, муурны цээживч, чипс, шарталтын эсрэг бэлдмэл зэрэг зүйлсийг худалдаж авсан байдаг

Гэрэл зургийг MPA агентлагийн онцгой зөвшөөрөлтэйгөөр ашиглав

УИХ-ын гишүүн Б.Пүрэвдорж төрийн өмчит компаниудын талаар мэдээлэл хийлээ.

Тэрбээр “Манай Э.Тамир гэдэг залуу над дээр орж ирээд “Хяналтын менежерүүдийг томилж байгаа юм байна. Намайг МИАТ компани дээр хяналтын менежерээр томилох санал ирлээ” гэхээр нь бид хоёр ярилцаж байгаад хяналтын менежер хийх гэж байгаа бол хамгийн үл бүтэх газар нь очиж ажиллаач гэж хүсэлт гаргасан. Энэ хүсэлтийн дагуу Э.Тамир маань Тавантолгой төмөр зам компанийн хяналтын менежерээр томилогдсон.

 

Гэрэл зургийг MPA агентлагийн онцгой зөвшөөрөлтэйгөөр ашиглав

Энэ компанид тодорхой хугацаанд ажиллаад төрийн өмчит компани яагаад ашигтай ажилладаггүй болох мэдээллийг ил болгож байна. Бид хоёр Б.Дэлгэрсайхан сайдыг албан өрөөндөө дуудаж уулзаж энэ мэдээллийг ил болгоно гэдгээ хэлсэн. Ингэхэд Б.Дэлгэрсайхан сайд тодорхой хугацаа өгөөч, энэ дээр ажиллаж байгаа, төрийн өмчийн компанид үр дүнгүй олон хүн ажилладаг байдлыг цэгцлэх шийдвэрийг Засгийн газар гаргана гэсэн. Үүний дагуу тодорхой шийдвэр гараад явж байх шиг байна.

Сүүлийн үед хяналтын менежерүүдийг шүүмжлэх хандлага гарах болсон. Би Э.Тамир найзынхаа хийсэн зүйл дээр үндэслээд хяналтын менежер яаж ажиллаж байгааг тайлбарлая.

Бид 5 их наяд төгрөгөөр төмөр зам барьсан. Гэтэл Тавантолгойн уурхайгаас Ганц модны нүүрсний талбай хүртэл нэг тон нүүрсийг авто тээврээр 15.74 ам.доллароор тээвэрлэж байгаа бол төмөр замаар 17.97 ам.доллароор тээвэрлэж байна. Тэнд улс төрчдийн нөлөө орж, үр ашиггүй олон хүн ажиллаж байгаа учраас ийм өндөр үнээр тээвэр хийхээс өөр аргагүй болсон.

Тавантолгой төмөр зам компани 1,000 ажилтантай. Гэтэл яг адилхан урттай зам дээр хувийн хэвшлийн компани 280 ажилтантай байна. Улаанбаатар хотод Тавантолгой төмөр замын 180 ажилтан 1,800 м.кв талбайтай өндөр түрээстэй байранд ажиллаж байгаа бол хувийн хэвшлийнх яг адилхан үйл ажиллагааг 9 хүн 60 м.кв оффист ажиллаж байна.

Тавантолгой төмөр замын захирал 19 сая төгрөгийн цалинтай, ажилтнууд нь 4-5 сая төгрөгөөр цалинждаг.

Тавантолгой төмөр замд ажиллаж байгаа 1,000 ажилтны 400-500 нь сонгууль ажилласан хүмүүс. Тэд нарыг бүгдийг нь ажилд томилж байна.

Э.Тамирын хичээл зүтгэлийн үр дүнд 1,000 ажилтантай Тавантолгой төмөр зам ХХК болон 900 орчим ажилтантай Монголын төмөр зам ТӨХК-ийг нэгтгээд 1,000 орчим ажилтантай компани болгох бүтцийн өөрчлөлт хийх гэж байгаа" гэв. 

Тавантолгой төмөр зам ХХК-ийн хяналтын менежер Э.Тамир “Өнгөрсөн оны арваннэгдүгээр сард хяналтын менежер гэдэг албан тушаалыг Засгийн газар бий болгосон. Тухайн үед улс төрчид энэ талаар огт дуугараагүй. Харин төрийн өмчит компаниуд дээр очоод асуудлуудыг нь дэлгээд эхлэхээр улс төрчдийн эрх ашиг хөндөгдөөд “Хяналтын менежерүүд орон тоо бөглөж байна” гэх болсон.

 

Гэрэл зургийг MPA агентлагийн онцгой зөвшөөрөлтэйгөөр ашиглав

Би нэгдүгээр сард томилогдсон. Гэвч надад бичиг баримтуудаа өгөхгүй байгаа. Тиймээс бүр төрлийн шалгалт оруулсан. Хяналт, үнэлгээний үндэсний хорооны шалгалт одоо дуусаж байгаа. Өнгөрсөн долоо хоногт татварын шалгалт оруулсан. Дараа нь НДЕГ-аас шалгалт орно.

Төрийн өмчит компаниудын бүтэц орон тоо давхацдаг. Жишээ нь, худалдан авах ажиллагааны газар нь хоёр байдаг. Нэг нь санхүү дээрээ нөгөө нь захиргаан дээрээ.

Ганц жишээ хэлэхэд, муурны хоол, муурны цээживч, чипс, шарталтын эсрэг бэлдмэл зэрэг зүйлсийг худалдаж авсан байдаг. Зүгээр л нэг санхүүгийн баримт гаргаж ирэхэд тийм байна. Одоо шалгалтуудаар маш олон зүйл ил болох байх" гэлээ.