Хятад улс Трампын татварын эсрэг хариу арга хэмжээ зарлаж, АНУ-ын хөрөнгийн зах зээл хоёр дахь өдрөө дараалан уналаа

Трампын зарласан худалдааны дайны хариуд Хятадын засгийн газар өчигдөр АНУ-ын бүх бараа бүтээгдэхүүнд 34 хувийн импортын татвар оноож, чухал ашигт малтмалын нийлүүлэлтээ хязгаарлаж, Америкийн компаниудыг хар жагсаалтад нэмсэн байна.

Мөн Трампын засаг захиргааг “олон улсын худалдааны дэг журмыг зөрчлөө” хэмээн шүүмжилжээ.

Лхагва гарагт ерөнхийлөгч Дональд Трамп дэлхийн бараг бүх улсын АНУ-д нийлүүлдэг бараа бүтээгдэхүүнд импортын өндөр татвар оноох шийдвэрээ зарласан юм.

Үүнийгээ тэр Америкийн бараа бүтээгдэхүүнд оноосон татварынх нь “хариу татвар” гэж тайлбарлаж байгаа.

Пүрэв гарагт АНУ-ын хөрөнгийн зах зээлд сүүлийн таван жилийн хугацааны хамгийн огцом уналт бий болсон билээ. Тэгвэл Баасан гарагт энэ уналт улам гүнзгийрчээ.

Өчигдөр АНУ-ын хөрөнгийн зах зээлийн гол гурван индекс тус бүр 5-аас дээш хувиар унаж, 2020 оноос хойших хамгийн муу долоо хоногийг хаасан байна.

Их Британид FTSE 100 индекс мөн тав орчим хувиар унаж, Ази, Герман, Францын гол индексүүд ойролцоо түвшинд унажээ.

Гэсэн хэдий ч Трамп өчигдөр “Хүчтэй байгаарай. Бид алдахгүй” гэж сошиал хуудасны дагагчдадаа хандан бичсэн байна.

Трампын худалдааны дайны нөлөө түрүүчээсээ Бямба гарагт мэдрэгдэж эхэлнэ гэж шинжээчид үзэж байгаа. Америкчуудын зарим хэсэг нь өргөн хэрэглээний бараа бүтээгдэхүүн нөөцөлж эхэлсэн байна.

JP Morgan банк энэ онд дэлхий дахинд эдийн засгийн хямрал нүүрлэх магадлалыг 40 хувиас 60 хувь болгон өсгөж, АНУ-ын эдийн засгийн өсөлтийг 2 нэгж хувиар буурах тооцоог зарлажээ.

АНУ-ын холбооны нөөцийн банкны захирал Жером Повел өчигдөр үг хэлэхдээ Америкийн эдийн засаг яг өнөөдөр хүчтэй хэвээр байгааг баталсан ч Трампын авсан арга хэмжээний улмаас өсөлт удааширч, инфляц өсөх эрсдэлтэйг анхааруулсан байна.

Дэлхийн хөрөнгийн зах зээлийн төлөв байдлыг дурдвал:

• Dow Jones индекс өчигдөр 5.5 хувиар унаж, хоёрдугаар сарын оргил үеэсээ хойш нийт 10 хувиар унаснаар “correction” төлөвт шилжлээ
• Nasdaq индекс 5.8 хувиар унаж, арванхоёрдугаар сарын оргил үетэйгээ харьцуулахад 20 орчим хувиа алдаад байна.
• Их Британид FTSE 100 индекс 4.9 хувиар буурсан нь 2020 оны гуравдугаар сарын 27-ноос хойш нэг өдрийн дотор үзсэн хамгийн том уналт боллоо
• Европын бусад зах зээлүүдийн хувьд Францын CAC 40 индекс 4.3, Германы Dax индекс бараг 5 хувиар тус тус унажээ.
• Өчигдөр өглөө Японы ерөнхий сайд үүссэн нөхцөл байдлыг “үндэсний хямрал” гэж тодорхойлсны дараа Nikkei 225 индекс 2.7 гаруй хувиар унасан байна
• Газрын тосны олон улсын Brent crude үнэ бараг 6 хувиар уналаа.

Трампын холбоотнууд хүртэл түүний авсан арга хэмжээг шүүмжилж эхэлсэн байна.

Бүгд Найрамдах Намаас сонгогдсон Техасын сенатор Тэд Круз “Хэрвээ Америкийн өндөр татвар, бусад улсуудын Америкийн бараанд оноох өндөр татвар цаашдаа 30 хоног, 60 хоног, 90 хоног үргэлжилбэл аймшигтай үр дагаварт хүрэх болно” гэж нэгэн подкаст ярилцлагын үеэр хэлжээ.

Эх сурвалж: BBC