Ж.Эрдэнэбаяр: IShowSpeed-ыг Монголд зочлуулж, соёлын өв, уламжлалаа танилцуулахад улсын төсвөөс нэг ч төгрөг зарцуулаагүй

Гэрэл зургийг MPA агентлагийн онцгой зөвшөөрөлтэйгөөр ашиглав

Олон сая дагагчтай контент бүтээгч IShowSpeed өчигдөр Улаанбаатарт зочилж, нийслэлийн төв талбай, Чингис хаан үндэсний музей, Монгол бөхийн өргөө зэрэг газарт очин манай улсын соёл уламжлалтай танилцах үйл явцаа шууд дамжуулсан. 

Үүний зэрэгцээ олны анхаарлыг татсан хэд хэдэн зүйл байсны нэг нь түүний орчуулагчаар Улсын Их Хурал(УИХ)-ын Тамгын газрын Парламентын сурталчилгааны хэлтсийн дарга Ж.Эрдэнэбаяр ажилласан нь байв. Мөн IShowSpeed-ыг Монголд авчрахын тулд хэдэн төгрөг зарцуулснаа ил тод мэдээлэхийг иргэд шаардаж байгаа юм.

Үүнтэй холбоотойгоор орчуулагчаар ажилласан Ж.Эрдэнэбаяр өнөөдөр өөрийн хаягтаа дараах тайлбарыг оруулжээ.

Тэрбээр "IShowSpeed буюу Даррен Жейсон Уоткинс нь АНУ-д төрж өссөн, дэлхий дахинд танигдсан контент бүтээгч бөгөөд зөвхөн YouTube платформ дээр гэхэд 38.6 сая гаруй дагагчтай, 4 тэрбум гаруй үзэлттэй инфлюэнсер.

Speed нь дэлхийн олон орноор аялж, тухайн улс орон, соёлын талаарх сэтгэгдлээ хэнээс ч үл хамааран, шууд бөгөөд өөрийнхөөрөө илэрхийлдэг контент бүтээгч юм.

Тэрээр БНХАУ-д аялах хугацаандаа Монгол Улсад зочлох талаараа өөрийн сувгаар мэдээлсэн бөгөөд түүнтэй холбогдож, Монгол Улсад зочлоход нь угтаж, аяллын хөтөлбөрт санал солилцон, орчуулагчийн үүрэг гүйцэтгэсэн.

Зочлох хугацаанд нь соёлын өвийг таниулах, монгол ахуй уламжлалаа сурталчлах үйл ажиллагааг зохион байгуулж, үр дүнд нь 6 цаг үргэлжилсэн шууд дамжуулалт ямар нэгэн асуудалгүй, найрсаг, эерэг уур амьсгалтай болж өндөрлөсөн.

Энэ бүх ажлыг зохион байгуулахад Монгол Улсын төсвөөс нэг ч төгрөг зарцуулаагүй гэдгийг хариуцлагатайгаар мэдэгдэж байна.

Шууд дамжуулалтын үеэр Монголчууд маань халуун дотноор хүлээн авч, монгол дээл, зодог шуудаг, малгай, бээлий зэрэг үндэсний онцлог бүхий бэлгийг халуун сэтгэлийн илэрхийлэл болгон өгсөн нь гадаадын үзэгчдэд гүн сэтгэгдэл үлдээсэн.

Мөн IShowSpeed-ийн багийн зүгээс Монголын залуу уран бүтээлчидтэй хамтрах хүсэлт илэрхийлж, Ангууч, Грэмикс нартай холбогдож өгөхийг хүссэн. Уг хүсэлтийг уламжлахад манай залуус талархан хүлээн авч, бичлэгт оролцсон.

Өчигдөр хүйтэн байсан хэдий ч, түүний Монголд хийсэн шууд дамжуулалт олон улсын үзэгчдээс өндөр үнэлгээ авч, энэ өглөөний байдлаар 6 сая гаруй хандалттай, Instagram хуудсандаа оруулсан reel бичлэг нь 24 сая хандалт авч, маш олон эерэг сэтгэгдэл хүлээн авсан нь бидний хамтын ажиллагаа, зочломтгой зан, өвөрмөц соёлыг харуулсан сайхан жишээ боллоо" гэжээ.