Өмнөд Солонгосын огцорсон ерөнхийлөгч гэргий болон 11 нохой, муурын хамт нийтийн орон сууцанд нүүн оржээ

Өмнөд Солонгосын ерөнхийлөгч асан Юн Сүк Ёл өчигдөр буюу Баасан гарагт ерөнхийлөгчийн ордноос гэргий, 11 нохой, муурын хамт Сөүл хотын өндөр үнэтэй дүүрэгт оршдог хувийн орон сууцандаа нүүн оржээ.

Тэрбээр өнгөрсөн оны сүүлээр улс орондоо цэргийн дэглэм зарлаад буруудсан юм. Өмнөд Солонгосын Үндсэн Хуулийн Шүүх түүнийг огцруулах шийдвэрийг өнгөрсөн долоо хоногийн Баасан гарагт гаргаж байв.

Юн Сүк Ёл болон түүний гэргий Ким Кон Хэ нар гэртээ амьтан тэжээх дуртай хүмүүс гэгддэг. Ерөнхийлөгчийн тангараг өргөх үедээ тэд дөрвөн нохой, гурван мууртай байжээ.

Экс ерөнхийлөгчийн гэр бүл Хан мөрний өмнөд эрэгт оршдог Ганнам дүүргийн 164 м.кв талбайтай орон сууцанд амьдрах юм байна.

Өмнөд Солонгосын засгийн газар тэдний аюулгүй байдлыг таван жилийн турш хариуцах 50 ажилтныг томилсон тухай орон нутгийн хэвлэлүүд мэдээлжээ.

Юн Сүк Ёлын амьдрах орон сууц нь 37 давхар гурван барилгаас бүрддэг Acrovista цогцолбор хотхон юм байна. Энэ хотхон 750 гаруй айлтай ажээ.

Өмнөд Солонгосын өмнөх ерөнхийлөгч нар хугацаа нь дууссаны дараа нийтийн орон сууцанд бус, амины орон сууцанд амьдарч байсан тул энэ нь ховор тохиолдол болж байна.

Acrovista хотхоны оршин суугчид Юн Сүк Ёлын гэр бүл, түүнийг дагалдсан хамгаалалтын олон ажилтан тав тухыг нь алдагдуулахаас болгоомжилж байгаа тухай хэвлэлүүд мэдээлжээ.

Уг хотхон нь 1995 онд нурахдаа 502 хүний амийг хөнөөж, 1,000 гаруй хүнийг гэмтээсэн их дэлгүүрийн барилгын газар дээр баригдсан юм байна.

Энэ үйл явдлыг Өмнөд Солонгосын түүхэнд хүний үйл ажиллагаанаас үүдэлтэй хамгийн том гамшиг гэж үздэг ажээ.

Эх сурвалж: CNN