Ертөнцөөс тусгаарлагдсан арлын оршин суугчидтай уулзахыг завдсан Америк жуулчныг Энэтхэгийн цагдаа нар баривчилжээ

Гадаад ертөнцөөс тусгаарлагдан амьдардаг арлын оршин суугчидтай уулзахыг завдсан Америк жуулчныг баривчилснаа Энэтхэгийн цагдаагийн төлөөлөгч өчигдөр мэдээлжээ.

Наргил модны самар, лаазтай Diet Coke ундаа авч явсан 24 настай Михаило Викторович Поляков гэгч Андаманы бүлэг арлын нэг хэсэг болох Умард Сентинел арлын эрэгт хөл тавиад баривчлагдсан юм байна.

Гадаадын төдийгүй нутгийн иргэдийг ч 5 км-ээс дотогш ойртохыг хориглодог уг арал дээр 150 орчим тооны уугуул хүн балар эртний овог отгийн зохион байгуулалттай амьдардаг юм.

“АНУ-ын иргэнээс мэдүүлэг авах зорилгоор гурав хоногийн хугацаатай баривчилж, орон нутгийн хуулийн байгууллагад шилжүүллээ” гэж Андаман болон Никобарын арлуудын цагдаагийн газрын тэргүүн Х.Г.С Даливал мэдээлжээ.

Цагаан элсэн эрэгтэй, өтгөн ойгоор хучигдсан Сентинел арлын оршин суугчид хамгийн сүүлд 2018 онд хууль бус замаар тус аралд хүрсэн АНУ-ын 27 настай иргэн, шашны номлогч Жон Аллен Чаугийн амийг хөнөөж байв.

Чаугийн цогцос олдоогүй бөгөөд Энэтхэгийн хуулиар аралд хүрэхийг хатуу хориглодог тул энэхүү аллагын араас мөрдөн байцаалт явуулалгүй өнгөрсөн юм.

 

Михаило Викторович Поляков

Поляков арал дээр хөл тавьсныхаа дараа уугуул хүмүүсийн анхаарлыг татахын тулд нэг цагийн турш шүгэл үлээснийг шалгаж тогтоосноо цагдаагийн төлөөлөгч мэдээлжээ.

Ингэхдээ тэр бас авч очсон хүнсний зүйлсээ эрэгт үлдээж, элснээс нь дээж авсан байна.

Түүний хийсэн үйлдлүүдийг биедээ авч явсан GoPro камерын бичлэгээр баталсан гэнэ.

Поляковыг арлаас буцаж ирснээс нь хойш хоёр хоногийн дараа баривчилжээ.

Тэрбээр сүүлийн саруудад Умард Сентинел аралд хүрэхээр хоёр ч удаа оролдож байсныг тогтоосон байна. 2024 оны арванхоёрдугаар сард тэр хийлдэг завиар арал руу явах гэж байсныг зочид буудлын ажилтнууд хориглон зогсоож байжээ. Нэгдүгээр сард Поляков дахин нэг удаа оролдоод бүтэлгүйтсэн байна.

Харин сүүлийн удаад тэр мотортой хийлдэг завь ашиглан 35 км зам туулсны эцэст арлын эрэгт хүрч чаджээ. Азаар тэр арлын уугуул иргэдтэй уулзаж чадаагүй юм байна.

Хэрвээ уулзсан бол алуулах нь бараг тодорхой байсан гэнэ.

Эрт үеэс хойш гадаад ертөнцөөс тусгаарлагдсан амьдарч буй энэ хүмүүс аралд нь гаднаас нэвтрэх гэсэн оролдлого бүрийг дайсагнан хүлээж авдаг.

Энэтхэгийн эргийн хамгаалалтын алба, Survival International байгууллагынхан хорь орчим жилийн өмнө нисдэг тэргээр аралд ойртоход уугуул хүмүүс өөдөөс нь нум сумаар харваж эсэргүүцсэнийг гэрэл зурагт буулгасан байдаг.

Цагдаа нар Поляковт тусалсан байж болзошгүй нутгийн иргэдийг илрүүлэхээр ажиллаж эхэлсэн байна.

Эх сурвалж: AFP