Өмнөд Солонгосын ерөнхийлөгчийг огцруулах эцсийн шийдвэр гарлаа

Улс орондоо цэргийн дэглэм зарлаад буруудсан Өмнөд Солонгосын ерөнхийлөгч Юн Сүк Ёлыг хугацаанаас нь өмнө огцруулахыг дэмжсэн шийдвэрээ тус улсын Үндсэн Хуулийн Шүүх дөнгөж сая зарлалаа.

Уг шийдвэр эцсийн шийдвэр бөгөөд нэн даруй хэрэгжих ёстой юм.

Тиймээс тус улсад 60 хоногийн дотор шинэ ерөнхийлөгчийг сонгох ээлжит бус сонгууль зохион байгуулагдахаар болж байна.

Юн Сүк Ёл өнгөрсөн оны арванхоёрдугаар сарын 3-ны өдөр улс орондоо цэргийн дэглэм тогтоох шийдвэр гаргасныг нь хэдхэн цагийн дараа тус улсын сөрөг хүчин давамгайлсан парламент цуцалж байв.

Үүний дараа түүний бүрэн эрхийг түдгэлзүүлж, хууль зөрчсөн эсэхийг нь мөрдөн шалгаж эхэлсэн юм.

Прокурорууд Юн Сүк Ёлыг нэгдүгээр сард баривчилж, гуравдугаар сарын 8-ныг хүртэл хорьж байв.

Цэргийн дэглэм тогтоохдоо ерөнхийлөгч хууль зөрчсөн эсэх асуудлыг Үндсэн Хуулийн Шүүх сар гаруй хугацаанд нягтлан хянасны эцэст дүгнэлтээ гаргаж байна.

Эх сурвалж: Yonhap News