Дэлхийн Хоёрдугаар дайны код тайлагчдаас үлдсэн сүүлчийн хүн 101 насандаа таалал төгсжээ

Дэлхийн Хоёрдугаар дайны үеэр Германы нацистуудын нууц харилцаа холбоог дундаас нь задалж унших ажлыг гүйцэтгэж байсан хүмүүсийн сүүлчийнх нь болох Британийн иргэн Шэрлот Вэбб 101 насандаа таалал төгсжээ.

Тэрбээр 18 настайдаа Их Британийн нууц албаны Блэчли Парк дахь дайсны нууц мэдээллийн кодыг тайлах төвд ажиллаж эхэлсэн юм.

Бага насандаа ээжээрээ герман хэл заалгаж байсан нь түүнийг энэ ажилд сонгогдоход нөлөөлсөн байна.

 

Вэбб 1975 онд дайны үеийн нууц мэдээллийн хориг цуцлагдах хүртэл эцэг эх, ойр дотнынхондоо ямар ажил эрхэлж байснаа нууцалж, Блэчли Парк төвд нарийн бичгээр ажилладаг гэж хэлдэг байжээ.

Дөрвөн жил ажилласны дараа 1945 оны тавдугаар сард Европ тивд дайн дуусахад тэр Блэчли Паркаас ганцаараа Вашингтонд уригдаж, Японы цэргийнхний хоорондоо дамжуулсан нууц мэдээллийг тайлахад тусалж байсан юм.

Францын ерөнхийлөгч Франсуа Олландын 2014 онд гаргасан шийдвэрээр Францыг чөлөөлөхөд оролцсон Британийн 6,000 ахмад дайчныг Хүндэт Легионы одонгоор шагнасны нэг нь хатагтай Вэбб байжээ.

Тэр бас 2023 онд Гуравдугаар Чарльз хааныг ширээнд залах ёслолд уригдсан 2,200 орчим хүндэт зочны нэг болж байв.

Их Британийн зэвсэгт хүчин түүний 100 насны төрсөн өдөр Дэлхийн Хоёрдугаар дайны үед ашиглагдаж байсан Lancaster хүнд бөмбөгдөгч онгоцоор нисгэн хүндэтгэл үзүүлсэн юм.

Эх сурвалж: BBC