"Найрамдлын болон Офицеруудын ордноос Саппоро хүртэлх төв замыг долдугаар сарын 10-наас өмнө засварлаж дуусгана"

Гэрэл зургийг MPA агентлагийн онцгой зөвшөөрөлтэйгөөр ашиглав

1978 оноос хойш их засвар хийгээгүй Найрамдлын зам, 2008 оноос хойш их засвар хийгээгүй Энхтайвны өргөн чөлөөний авто замыг энэ онд бүрэн шинэчлэх юм байна.

Энэ тухай Нийслэлийн Замын Хөгжлийн Газрын Засвар, арчлалтын хяналтын хэлтсийн дарга О.Энхбаатар "2024 онд 10-аас дээш насжилттай, засварт ороогүй замуудыг засварлаж эхэлсэн. Эдгээрээс хамгийн өндөр насжилттай, хуучирсан Найрамдал зуслан чиглэлийн замыг шинэчилж байгаа. Уг замд 1978 оноос хойш их засвар хийгээгүй юм. 

Мөн Энхтайвны өргөн чөлөөний авто замд 2008 оноос хойш их засвар хийгдээгүй. Нийслэлд тус өргөн чөлөөний зам хамгийн их эвдрэлтэй байгаа. Тиймээс Зүүн дөрвөн замаас 25 дугаар эмийн сан хүртэлх замыг өнөөдрөөс засварлаж эхэлж байна. Үргэлжлүүлэн 25 дугаар эмийн сангаас Саппоро, Зүүн дөрвөн замаас Офицеруудын ордон хүртэлх замыг засварлана. Ингэснээр Энхтайвны өргөн чөлөөнд Офицеруудын ордноос Саппоро хүртэлх 8.9 километр зам бүрэн шинэчлэгдэх юм.

Найрамдлын зам болон Энхтайвны өргөн чөлөөний авто замын засварын ажлыг 2025 оны долдугаар сарын 10-наас өмнө дуусгана" гэж мэдээллээ.

Өнгөрсөн онд авто замын засвар, шинэчлэлийн үеэр эвдрээгүй хашлагыг/бродюр/ сольж, төсвийн мөнгийг үрэн таран хийж байгаад иргэд шүүмжлэлтэй хандаж, бродюрыг солихгүй гэдгээ хотын дарга амлаад буй.

Харин энэ онд Их, Бага тойруу, Энхтайвны өргөн чөлөө, Наадамчдын гудамж, Олимпын гудамжны явган хүний замыг бүхэлд нь байгалийн чулуун материалаар солихоор болоод байгаа юм.