Х.Нямбаатар: Хуучнаар худалдаа үйлдвэрлэлийн дээд сургууль болон Спортын ордны зүүн талд явган хүн зорчих орц, гарц бараг алга

Гэрэл зургийг MPA агентлагийн онцгой зөвшөөрөлтэйгөөр ашиглав

Нийслэлийн нягтаршил ихтэй байршилд барилгажилт их явагдаж, явган хүний замгүй, автомашины зогсоолгүй болсныг хотын дарга Х.Нямбаатар өнөөдөр өөрийн биеэр явж үзэж, Сүхбаатар дүүргийн наймдугаар хорооны нутаг дэвсгэрт ажиллав.

Энэ үеэр тэрбээр "Сүхбаатар дүүргийн наймдугаар хорооны нутаг дэвсгэрт ажиллаж байна. Улаанбаатар хотод сүүлийн жилүүдэд барилгажилт их явагдсанаас шалтгаалж иргэд явганаар алхах боломжгүй байгаа. Тухайлбал зогсоолгүйгээс явган хүний гарцан дээр машинаа тавьчихдаг. Түүнчлэн авто замын нэгдүгээр эгнээг хааж машинаа зогсоосноос түгжрэл үүсгэдэг. Хүнд зориулагдаагүй машинд зориулагдсан хот болсныг шийдье гэж байгаа юм.

Дүүргүүд явган хүний зам, талбайг өөрсдийн төсвөөр тохижуулах үүргийг өгсөн.

Төлөвлөгөөний дагуу дүүрэг бүрд тохижилт бүтээн байгуулалтын ажил эхэлнэ. Өнөөдөр Сүхбаатар дүүрэгт явган хүн алхах замгүй болсон газруудын зарим хашаа хайсыг татуулах, газрыг чөлөөлөх, явган хүний замыг нээх ажил эхэлж байна.

Тус дүүргийн наймдугаар хороо, хуучнаар Худалдаа үйлдвэрлэлийн дээд сургуулийн хойд тал, Спортын төв ордны зүүн талын хэсэгт явган хүн зорчих орц, гарц бараг байхгүй, барилга барьсныг цэгцлэх юм. Энэ орчинд газар доор автомашины зогсоол барих асуудлыг судална. Зогсоол барих газрыг шийдэж, хотын төвд байршуулсан чингэлгүүдийг холдуулна.

Ирэх долоо хоногт Чингэлтэй дүүрэгт уг ажил эхэлнэ. Дүүргүүдийн явган хүний зам талбайн тохижилтод шаардагдах хөрөнгийг нийслэлийн төсөвт тусгасан байгаа.

Энэ жил Их, Бага тойруу, Энхтайвны өргөн чөлөө, Наадамчдын гудамж, Олимпын гудамжны явган хүний замыг бүхэлд нь шинэчлэхээр төлөвлөсөн. Явган хүний замыг тохижуулах тендер зарлачхаад байхад оролцох ААН-үүд алга.

Үүнээс гадна Туул, Сэлбэ гол орчмын тохижуулах ТЭЗҮ-ийг хийж дууссан. БНХАУ-ын Засгийн газрын хөнгөлөлттэй 60 сая ам.долларын зээлээр энэхүү хоёр голын орчмыг тохижуулах ажлыг энэ онд эхлүүлнэ" гэж ярилаа.

Түүний өгсөн зарим мэдээллийг багцлан хүргэж байна.

• Цэвэр, бохир усны шугамгүй, гудамжинд угаадсаа цацдаг ТҮЦ-ийн үйл ажиллагааг зохимжгүй гэж үзэж байгаа. Явган хүний зам хааж тавьсан ТҮЦ, пирожкины газруудыг нүүлгэнэ.
• Нийслэлийн 90 байршилд гаднын франчайз жижиг үйлчилгээтэй, автомашины зогсоол барих ТЭЗҮ-ийг хийлгэнэ.
• Улсын Их Дэлгүүрийн өмнөх автомашины зогсоолыг газар доор болгох асуудлаар удирдлагуудтай нь уулзаж, ярилцана. 
• Хүүхэд Гэр Бүл, Хүүхэд Залуучуудын Хөгжлийн Газрын хажууд байршуулсан гараашнуудыг буулгаж автомашины зогсоолтой болгох, явган хүний замуудыг гаргах, тохижилт хийх үүргийг Замын хөгжлийн газар, Газар зохион байгуулалтын албаныхан болон хотын ерөнхий архитекторт даалгая.
• Сүхбаатар дүүргийн есдүгээр хорооны нутагт сүүлийн арав гаруй жил баригдаагүй гурван балгас бий. Эдгээр сууриудын эзэдтэй уулзаж, З.Төмөртөмөөгийн удирддаг Улаанбаатар орон сууцны корпорацад эрхийг нь өгч, төр, хувийн хэвшлийн түншлэлээр нягтаршил багатай орон сууц барих, автомашины зогсоол, явган хүний гарцтай болгох ажлыг зохион байгуулна.
• Гаалийн Ерөнхий Газрын баруун талд байсан эмийн үйлдвэрийн тодорхой газрыг дуудлагаар худалдаж, үлдсэн хэсэгт зам барьж байгаа.
• 100 айл орчмын явган хүний замыг тохижуулна.
• Хангай хотхоны хүүхдүүдийг сургуультай болгоно.
• Сэлбэ дэд төвийн газар чөлөөлөлтийн үеэр 2,000 гаруй айлын хашааг буулгахад олон муур, нохой эзэнгүй орхигдсон. Золбин нохой, муурыг цэгцлэх асуудалд дүүргүүд анхаарлаа хандуулах хэрэгтэй.
• Амралтын өдрүүдэд явган хүний замыг нээх ажлуудыг хийнэ.