Д.Хадбаатар: Нийслэлийн ногоон бүсэд хөдөлгөөнт эргүүл ажиллаж байна
Нийслэлийн хэмжээнд ой хээрийн болон шар өвсний гал түймрээс урьдчилан сэргийлэх ажлыг эрчимжүүлжээ.
Энэ тухай НОБГ-ын Гамшгаас урьдчилан сэргийлэх хэлтсийн дарга, дэд хурандаа Д.Хадбаатар "Нийслэлийн Онцгой Байдлын Газар, Нийслэлийн Цагдаагийн Удирдах Газар, Тээврийн Цагдаагийн Алба, Нийслэлийн Байгаль, Орчны Газрын нийт 32 алба хаагч таван автомашинтайгаар 31 чиглэлд хөдөлгөөнт эргүүл хийж, ногоон бүсэд зорчиж байгаа иргэдэд ой хээрийн түймрээс урьдчилан сэргийлэх анхааруулга, зөвлөмжийг өгч байгаа юм.
Нийслэлд он гарсаар ой хээрийн түймэр бүртгэгдээгүй ч энэ сарын 1-ний байдлаар шар өвсний гал түймрийн 42 дуудлага бүртгэгдсэн.
Энэ жил хуурайшилт өмнөх жилүүдээс их байна. Иймд нийслэлийн ногоон бүсэд аялах, зугаалах, ил гал гаргах, алхах, төгсөлтийн баяр тэмдэглэх, зорчихыг зургаадугаар сарын 10-ныг хүртэл хориглосон.
Иргэд гаргасан шийдвэрийн дагуу хариуцлагатай байхыг анхааруулъя" гэж мэдээллээ.
Түүнчлэн хуурайшилттай байгаа энэ үед шар өвс, хог хаягдлыг шатаахгүй байхыг зөвлөв. Өнгөрсөн онд нийслэлийн хэмжээнд шар өвсний гал түймрийн 48 тохиолдлоор 62.7 га талбай шатаж, иргэдийн өмч хөрөнгө, байгаль экологид хохирол учирчээ.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
