Ардчилсан Конго улстай АНУ ашигт малтмалын гэрээ байгуулах гэж байгааг Трампын засаг захиргааны төлөөлөгч мэдээлжээ

Иргэний дайны хөлд нэрвэгдсэн Африк тивийн Бүгд Найрамдах Ардчилсан Конго Улсын эрх баригчидтай ашигт малтмалын хамтын ажиллагааны яриа хэлэлцээ явуулж байгааг Трампын засаг захиргааны төлөөлөгч өчигдөр мэдээлжээ.

Өмнө нь Конгын ерөнхийлөгч Феликс Чисекеди улс оронд нь дэг журам тогтооход тусалбал эрдэс баялгийн арвин нөөцөө онцгой нөхцөлөөр ашиглуулахад бэлэн байгааг мэдэгдэж байсан юм.

“Ашигт малтмалын гэрээний талаар та бүхэн сонссон байх. Бид Конгын саналыг судалж байгаа. Ерөнхийлөгч бид хоёр үүнийг цааш үргэлжлүүлэх тал дээр тохиролцсоныг мэдэгдэхэд таатай байна” гэж АНУ-ын ерөнхийлөгчийн Африкийн асуудал хариуцсан зөвлөх Массад Булос хэлжээ.

Америкийн компаниуд ил тод ажиллаж, орон нутгийн эдийн засгийг хөгжүүлэх боломжтойг тэр бас мэдэгдсэн байна.

Конго бол цахилгаан автомашин, ухаалаг гар утас зэрэг орчин үеийн технологийн бүтээгдэхүүнүүдийн батарейн гол түүхий эд болох кобальтын олборлолтоор дэлхийд тэргүүлэгч улс юм.

Мөн алт, алмааз, зэсийн арвин их нөөцтэй.

Ерөнхийлөгч Чисекеди өнгөрсөн сард хэвлэлд ярихдаа АНУ-ын оролцоо тус улсын аюулгүй байдлыг бэхжүүлж, босогчдын үймээн самууныг дарахад тусалбал энэ салбарт хамтран ажиллахад бэлэн байгааг илэрхийлж байв.

Чисекедигийн гаргасан санал нь АНУ-ын засаг захиргааны Украины талтай хэлэлцэж байгаа ашигт малтмалын хамтын ажиллагаанаас үүдэлтэй бололтой.

 

Конго улсын зүүн хязгаарт 100 гаруй зэвсэгт бүлэглэлийн мөргөлдөөн олон арван жилийн турш үргэлжилж байгаа.

Тэдгээрийн хяналтад Руандатай хил залгаа Конгын хамгийн их газрын баялагтай нутаг оршдог юм.

Энэ нутагт өнөөдөр дэлхийн хамгийн том хүмүүнлэгийн хямралуудын нэг үргэлжилж, долоон сая гаруй хүн орон гэрээсээ дүрвээд байна. Зөвхөн энэ он гарснаас хойш 100,000 хүн дүрвэжээ.

Зэвсэгт бүлэглэлүүдийн хамгийн том нь болох Руандагийн дэмжлэгтэй M23 нэгдүгээр сараас хойш өргөн хүрээнд байлдааны ажиллагаа явуулж, Гома, Букаву зэрэг дорнод Конгын хэд хэдэн хот сууриныг эзлээд байна.

Өчигдөр буюу Пүрэв гарагт М23 бүлэг өнгөрсөн сард эзэлж авсан Валикале хотоо Конгын засгийн газрын арми болон түүний холбоотон Вазалендо зэвсэгт бүлэгт алдсан тухай мэдээ иржээ.

Валикале бол Конгын уул уурхайн асар том орд дээр оршдог хот юм.

Энэ хотын ойролцоо Конгын хамгийн том цагаан тугалгын орд, хэд хэдэн том алтны орд байдаг.

Эх сурвалж: Associated Press