Өмнөд Солонгосын ерөнхийлөгчийн хувь заяа өнөөдөр шийдэгдэнэ

Өмнөд Солонгосын Үндсэн Хуулийн шүүх өнөөдөр буюу Баасан гарагт тус улсын ерөнхийлөгч Юн Сүк Ёлыг цэргийн дэглэм зарласантай холбоотой хэргийн улмаас огцруулах эсэх шийдвэрээ зарлах гэж байна.

Шийдвэрийг орон нутгийн цагаар 11:00 цагт зарлах юм.

Юн Сүк Ёл өнгөрсөн оны арванхоёрдугаар сарын эхээр улс орон даяар цэргийн дэглэм тогтоох шийдвэр гаргасан нь Өмнөд Солонгосын нийгмийг төдийгүй дэлхий нийтийг цочроосон гэнэтийн үйл явдал байлаа. Гэвч парламент энэ шийдвэрийг нь хэдхэн цагийн дараа цуцалсан юм.

Өнгөрсөн дөрвөн сарын хугацаанд үүнийг тойрсон үйл явдлууд Өмнөд Солонгосын улс төр, эдийн засаг, нийгмийн амьдралд ноцтой хямрал үүсгэж байв.

Арванхоёрдугаар сарын дундуур сөрөг хүчин давамгайлдаг Үндэсний Ассамблей ерөнхийлөгчийн бүрэн эрхийг түдгэлзүүлж, шийдвэр гаргахдаа хууль зөрчсөн эсэхийг мөрдөн шалгаж эхэлсэн юм.

Хэрвээ Үндсэн Хуулийн шүүх Юн Сүк Ёлыг хууль зөрчсөн гэж үзвэл албан тушаалаас нь огцруулж, 60 хоногийн дотор ерөнхийлөгчийн ээлжит бус сонгуулийг зохион байгуулах хэрэгтэй болно.

Харин хууль зөрчөөгүй гэж үзвэл тэр бүрэн эрхээ сэргээж, үргэлжлүүлэн ажиллах юм.

 

Үндсэн Хуулийн шүүх одоо найман шүүгчээс бүрддэг бөгөөд тэдний ядаж зургаа нь санал нэгдсэн тохиолдолд Юн Сүк Ёлыг огцруулна.

Энэ удаа Үндсэн Хуулийн шүүх 38 өдрийн дараа шийдвэрээ зарлаж байгаа нь Өмнөд Солонгосын түүхэнд ерөнхийлөгчийг огцруулахтай холбоотой хамгийн урт шүүх ажиллагаанд тооцогдож байна.

Өмнө нь ерөнхийлөгч Ро Му Хёныг 14, Пак Гюн Хэг 11 өдрийн дараа огцруулж байжээ.

Мөрдөн байцаагчид Юн Сүк Ёлыг нэгдүгээр сард баривчилж, гуравдугаар сарын 8-ны өдөр хүртэл хорьсон юм.

Өнөөдөр Үндсэн Хуулийн шүүхийн шийдвэрийг зарлах үеэр үймээн самуун гарахаас сэргийлж, Сөүл хотын төв замуудыг хаасан байна.

Эх сурвалж: Yonhap News