Монос, Офицер, МИТС-ийн замыг олон түвшний уулзвартай болгож, Яармагийн зам дагуу явган хүний гүүрэн гарц барих шийдэлд хүрчээ

Олон түвшний уулзвар төслийн хүрээнд Монос, МИТС, Офицеруудын ордны тойрог, ХУД-ийн 23 дугаар хороо НЗДТГ-ын хойно Яармагийн буюу Наадамчдын зам дагуу явган хүний гүүрэн гарц, БЗД-ийн 42 дугаар хороо Нарт хотхоны зүүн далан дээр гүүрэн байгууламж барихаар таван байршилд ажлын даалгаврыг шинэчлэн батлуулжээ.

Уг төслийг Нийслэлийн Замын Хөгжлийн Газар хариуцаж байгаа бөгөөд эдгээр байршилд олон түвшний уулзвартай болгосноор Улаанбаатар хотын авто замын хөдөлгөөний дундаж хурд 7.1 хувиар нэмэгдэх тооцоолол гарчээ. Төслийг хэрэгжүүлэхэд 594 сая ам.доллар зарцуулна.

Төслийн гүйцэтгэлийн явц:

• Монос, Офицер, МИТС-ийн уулзваруудын загвар зураг батлагдсан
• Нарт хотхоны зүүн далангийн гүүрэн байгууламж, Наадамчдын замд явган хүний гүүрэн гарцын загвар зураг өөрчлөгдөн, зургийг боловсруулж, ерөнхий архитектороор батлуулсан
• Офицер, МИТС, Нарт хотхоны зүүн далангийн гүүрэн байгууламж, Наадамчдын замын явган хүний гүүрэн гарцын нарийвчилсан ажлын зураг боловсруулагдан улсын магадлал хийгдэж байна. Мөн  инженерийн шугам сүлжээний асуудлаар техникийн нөхцөл хүссэн албан бичиг болон материалуудыг холбогдох байгууллагуудад хүргүүлсэн. Нарийвчилсан зураг төслийн ажил 40 хувьтай үргэлжилж байна гэж НЗДТГ-ын хэвлэлийн хэлтсээс мэдээлэв.