“Б.Энхбаяр гишүүн юунд хорсоод гүйгээд байгаа юм бүү мэд”

Гэрэл зургийг MPA агентлагийн онцгой зөвшөөрөлтэйгөөр ашиглав

Авлигатай Тэмцэх Газрын даргыг улираан томилох асуудлыг байнгын хороо, чуулганы нэгдсэн хуралдаанаар хоёр хоног хэлэлцэн шийдвэрлэв.

Энэ үеэр УБТЗ-ын Тээвэр зохион байгуулалтын албаны орлогч даргаар ажиллаж байсан С.Батдөлтэй холбоотой асуудал сөхөгдөв. С.Батдөлийн гэр болон хамаарал бүхий этгээдүүдээс 7.3 тэрбум илрүүлж, татвар төлөхөөс зайлсхийсэн, мөнгө угаасан гэх үндэслэлээр шүүхээс ял оноосон. Гэтэл өчигдрийн Хууль байнгын хорооны хуралдааны үеэр Б.Энхбаяр гишүүн С.Батдөлийг Төр хурахын аман дахь ШШГЕГ-ын харьяа амралтын газарт байгаа. Тэр хүнийг амралтад амрааж байгаа сайд байна. Тэр сайд нь мөнгө мэддэг. Өөрийг нь илчлээгүйн төлөө Богд ууланд С.Батдөлийг амрааж байна. Мөнгө мэддэг сайд учраас шүүхийн шийдвэр гүйцэтгэх байгууллагын төсвийг хоёр дахин нэмэгдүүлсэн хэмээн ярьсан.  

Угтаа С.Батдөлийг ШШГЕГ-ын харьяа Төр хурах амралтын газарт байлгаж байсан ч хэвлэлд энэ тухай мэдээлэл нийтлэгдмэгц оны өмнөхөн хорих анги руу шилжүүлсэн байдаг.  

Гэтэл гурван сарын дараа Б.Энхбаяр гишүүн энэ явдлыг ярьж попров. Ингээд зогсохгүй “Мөнгө барьдаг сайд монголд ганцхан байдаг. Тэр С.Батдөл Дарханы хүн гэсэн” хэмээн ярьж зогссон. 

Ямартай ч хуулийн сайд байсан хүн хуучирсан мэдээллийг гэнэт гаргаж ирж, ингэхдээ Сангийн сайдыг давхар "намнав".

Тэгвэл Дарханы харьяалалтай, мөнгө барьдаг сайд Б.Жавхлан дараах хариултыг өгчээ.

Тэрбээр “Хуулийн байгууллага шалгаж тогтоогоод тэр залуу ялаа эдэлж байгаа гэж ойлгосон. Дарханых л байвал бүх мууг надад наах гэж оролдох юм. Би тэр залуутай ямар ч холбоо сүлбээгүй. Б.Энхбаяр гишүүн ярьсан зүйлээ нотлох хэрэгтэй. Юунд хорсоод гүйгээд байгаа юм бүү мэд. Ямар хорсол байна тэрийгээ надад нааж ярих сонирхол байх шиг байна” гэв.

Харин Хууль зүй, дотоод хэргийн сайд О.Алтангэрэлээс дээрх явдлын талаар асуухад “Хэн нэг хоригдлоос болж нэмэгддэг байгууллагын төсөв гэж байхгүй. Харин Б.Энхбаяр гишүүний ярьсанчлан хэн нэг хүнд давуу байдал олгосон зүйл байна уу үгүй юу гэдгийг тодруулж байна” гэсэн юм.

Эцэст нь ШШГЕГ-ын дарга Б.Нандинболороос Б.Энхбаяр гишүүний ярьсан зүйлийг сэтгүүлчид лавлажээ. Тэрбээр “Тэр хүн гурван шатны шүүхээс 7.4 жил хорих ял авсан. С.Батдөл Цагдан хорих 409 дүгээр ангид ялаа эдэлж байгаа.

Энэ хүн 2023 оны арваннэгдүгээр сард манай байгууллагын мэдэлд ирсэн. 2024 оны есдүгээр сард Төр хурах амралтын газрын аж ахуйн хэсэгт галчаар ажиллаж эхэлсэн. Энэ нь хуулиар хориглосон зүйл биш. Ингээд нэг сар 20 хоног галчаар ажиллуулаад, прокурорын тогтоолоор хорих анги руу татсан” гэдэг мэдээлэл өглөө.