СЭМҮТ: Аутизмын үнэлгээний "Ados - 2" аргачлалын дагуу оношилгоо хийдэг болов

"Монгол Улсад эмчлэгддэггүй өвчлөлийг бууруулах бодлого”-ын хүрээнд Сэтгэцийн Эрүүл Мэндийн Үндэсний Төв (СЭМҮТ)-ийн хүүхдийн сэтгэцийн эмч нар Турк улсад аутизмын оношилгоо, үнэлгээний “ADOS-2” аргачлалын онол болон дадлага сургалтад хамрагдсан юм.

Тэдгээр эмч нар СЭМҮТ-д аутизмын хүрээний эмгэгийн оношилгооны олон улсын стандарт аргачлал болох “ADOS-2” оношилгоо, үнэлгээний аргачлалын дагуу оношилгоо хийж эхэллээ.

Уг аргачлал нь асуултад хариулж, даалгавруудыг гүйцэтгэх явцад аутизмын хүрээний эмгэгийн үед илрэх эмнэл зүйн өвөрмөц шинж тэмдгүүд, зан үйлийн өөрчлөлтийг ажиглах замаар оношлох боломжийг олгодог байна.

Оношилгооны явцад өгөх даалгаврууд хөгжлийн янз бүрийн түвшин болон насны онцлогоос хамаарч өөрчлөгдөх ба үүгээр дамжуулан харилцааны ур чадвар, нийгмийн харилцааг үнэлэх боломжтой юм.

Өнгөрсөн оны аравдугаар сард СЭМҮТ-ийн шинэ цогцолбор ашиглалтад орсноор Хүүхэд Өсвөр Үеийн Клиник (ХӨҮК) нь эмчлүүлэгчдэд ээлтэй, ая тухтай орчныг бүрдүүлж, 20 ортойгоор, 3-аас 18 хүртэлх насны хүүхдүүдэд тусламж үйлчилгээ үзүүлж эхэлсэн юм.

Эх сурвалж: Эрүүл Мэндийн Яам