Финланд улс өөрийгөө хамгаалахын тулд мина хориглох гэрээнээс гарч, батлан хамгаалах зардлаа өсгөхөөр болов

НАТО-гийн шинэхэн гишүүн Финланд улс газрын мина хориглох олон улсын гэрээнээс гарч, батлан хамгаалах зардлаа үндэсний нийт бүтээгдэхүүний гурван хувьд хүргэж өсгөхөөр болсныг тус улсын засгийн газар өчигдөр зарлажээ.

Өнгөрсөн сард Польш болон Балтийн тэнгисийн гурван улс бас газрын мина хориглох 1997 оны Оттавагийн гэрээнээс гарах гэж байгаагаа зарласан юм.

Ингэснээр НАТО-гийн гишүүн орнуудаас ОХУ-тай хамгийн урт шугамаар (1,340 км) хил залгадаг Финланд улс шаардлагатай тохиолдолд газрын мина ашиглах боломжтой болж байна.

Шийдвэрийг танилцуулахдаа Финландын ерөнхий сайд Петтери Орпо улс оронд нь шууд заналхийлэл одоогоор тулгараагүй байгаа ч Оросын түрэмгий бодлого нийт Европын урт хугацааны аюул болж байгааг мэдэгджээ.

“Оттавагийн гэрээнээс гарах нь бидэнд аюулгүй байдлын шинэ орчин нөхцөлд илүү олон талтай бэлдэх боломжийг олгох юм” гэж тэр хэлсэн байна.

Орпо бас Финланд улс энэ онд батлан хамгаалах зардлаа гурван тэрбум еврогоор өсгөж, 2024 онд дотоодын нийт бүтээгдэхүүний 2.41 хувьтай тэнцэж байсныг 2029 он гэхэд гурван хувьд хүргэхээр болсныг мэдээлжээ.

Сүүлд Финландын ерөнхийлөгч Александр Стуб сошиал хуудсандаа “Энэ бол Европын батлан хамгаалах үйлсэд Финланд улсын оруулж буй хувь нэмэр юм” гэж бичсэн байна.

Олон жилийн турш төвийг сахих гадаад бодлоготой явж ирсэн Финланд улс Украины дайн эхэлсний дараа 2023 онд НАТО-д гишүүнээр элссэн юм.

Хүний эсрэг зориулалттай газрын минийг газарт булж ашигладаг ба хэн нэгэн дээр нь гишгэхэд тэсэрдэг маш аюултай зэвсэг.

Финланд улс 2012 онд Оттавагийн гэрээнд Европын Холбооны улсуудаас хамгийн сүүлд нэгдэж байжээ. Үүний дараа тус улс нэг сая гаруй минаны нөөцөө устгасан юм.

Оттавагийн гэрээнд дэлхийн 160 гаруй улс нэгдсэн байдаг бол Орос улс нэгдээгүй байдаг.

Энэ нь Хүйтэн Дайны үе өндөрлөсний дараа дэлхий дахиныг зэвсгээс ангижруулах зорилгоор байгуулагдсан олон улсын цуврал гэрээ хэлэлцээрүүдийн нэг юм.

Минаны эсрэг хөдөлгөөний идэвхтнүүд Нобелийн энх тайвны шагналыг хүртэж байв.

Газрын мина дэлхий даяар олон арван мянганы энгийн иргэний амь насыг хөнөөж, тахир дутуу болгосон. Тэдгээрийн нэлээд хэсэг нь дайн мөргөлдөөн дууссаны дараа хүмүүст аюул учруулж байв.

Эх сурвалж: BBC