Монголын математикийн 61-р олимпиад эхэллээ

Боловсролын яам, Боловсролын Ерөнхий Газрын ивээл дор зохион байгуулагдаж буй Монголын Математикийн 61-р олимпиадын нээлт 2025 оны 4 дүгээр сарын 1-нд болж, албан ёсоор эхэллээ.

Энэ жилийн олимпиадыг Монголын Математикийн Олимпиадын Хороо, Нийслэлийн Ерөнхий Боловсролын 11-р сургууль болон 1-р сургууль хамтран зохион байгуулж байна.

Монголын бизнесийн тэргүүлэх компаниуд болох Капитрон банк, Монполимет групп, АНД Глобал компани, ОНДО ХХК, Космо групп нийгмийн хариуцлагын хүрээнд боловсролын салбарт тэр дундаа математикийн шинжлэх ухаанд хөрөнгө оруулалт хийж, тус олимпиадыг дэмжин ажиллаж байна.

Олимпиад 2025.04.01-2025.04.05-ны өдрүүдэд болох бөгөөд гурван ангилалд нийт ЕБС-ийн 60,000 гаруй дунд, ахлах ангийн сурагчид, математикийн багш нар оролцож 3-ын даваанд:

• 9-10-р ангийн сурагчдын Е ангилалд 87;
• 11-12-р ангийн сурагчдын F ангилалд 85;
• Дунд, ахлах ангийн математикийн багш нарын Т ангилалд 67 оролцогч шалгарч мэдлэг, ур чадвараа сорин оролцож байна.      

Бүх шинжлэх ухааны хаан гэгддэг математикийн шинжлэх ухаанд шимтэн суралцаж, улсын математикийн олимпиадад шалгаран оролцож буй шилдэг сурагчид, багш нартаа амжилт хүсье.  

Дэмжигч байгууллагууд цаашид ч ЕБС-ийн сурагчдад математикийн шинжлэх ухааныг сурталчлан таниулах, түгээн дэлгэрүүлэх, хөгжүүлэх, цаашлаад олон улсад өрсөлдөхүйц түвшний боловсрол, ур чадвартай мэргэшсэн боловсон хүчнийг бэлтгэхэд хамтран ажиллана.

 

Монголын математикийн олимпиадыг зохион байгуулагчид