Studio Ghibli маягийн зураг үүсгэх боломж ChatGPT хэрэглэгчийн өсөлтийг түүхэн дээд хэмжээнд нь хүргэжээ

OpenAI компани өнгөрсөн долоо хоногт өөрийн хиймэл оюунт чатботын ChatGPT-4o хувилбарыг нэвтрүүлэхдээ Японы энимэйшн үйлдвэрлэлийн Studio Ghibli компанийн хэв маягтай зураг үүсгэх шинэ боломжийг үнэ төлбөргүй хэрэглэгчдэдээ олгосон юм.

Хэрэглэгчид өөрийн болон бусдын гэрэл зургийг дээрх компанийн үүсгэн байгуулагч Хаяао Мияазакигийн зурсантай яг адилхан болгон хувиргадаг болсон байна.

Өнгөрсөн өдрүүдэд дэлхий даяар ChatGPT хэрэглэгчид энэ боломжийг тултал ашиглацгааж байгаа. OpenAI компанийн гүйцэтгэх захирал Сэм Олтмэн хүртэл өөрийн ийм зургийг X хуудасныхаа танилцуулга хэсэгт оруулсан байна.

Ням гарагт Олтмэн “Та бүхэн зураг үүсгэхээ хязгаарлахгүй бол манай багийнханд унтаж амрах боломж олдохгүй байна” хэмээн сошиал хуудсандаа бичиж байв.

Даваа гарагт тэр сүүлийн нэг цагийн дотор ChatGPT платформ нэг сая хэрэглэгч шинээр бүртгэснийг бас сошиал хуудсаараа мэдээлсэн юм.

Хоёр жилийн өмнө тус платформ анх зах зээлд нэвтэрч байхад ийм тооны хэрэглэгч таван өдрийн хугацаанд нэмэгдэж байсныг Олтмэн харьцуулжээ.

Өнгөрсөн нэг долоо хоногийн хугацаанд ChatGPT аппликэйшний таталтын тоо, долоо хоногийн идэвхтэй хэрэглэгчийн тоо, төлбөртэй хэрэглэгчдээс болон аппликэйшн доторх худалдан авалтаас олдог орлогын хэмжээ өмнөх долоо хоногтой харьцуулахад тус тус 11, 5, 6 хувиар өссөнийг SensorTower зах зээлийн судалгааны компани мэдээлсэн байна.

Өнгөрсөн оны ижил долоо хоногтой харьцуулахад аппликэйшны таталтын тоо, аппликэйшн доторх худалдан авалтын орлого аль аль нь 500 хувь давж өссөнийг бас мэдээлжээ.

Үүнээс гадна гуравдугаар сарын эхний 28 өдрийн хугацаанд ChatGPT хандалтын тоо анх удаагаа дөрвөн тэрбум давсныг Similarweb компани мэдээлсэн байна.

Гэхдээ энэ амжилт нь OpenAI компанийн техникийн багтаамж, хүчин чадлыг нэлээд туйлдуулж байгааг Сэм Олтмэн бас хүлээн зөвшөөрсөн юм.

“Хүмүүс зураг үүсгэх боломжид ингэж дурлаж байхыг харах үнэхээр сайхан байна. Гэхдээ нөгөө талаар манай GPU (график процессор) хайлж байна. Бид үүнийг илүү оновчтой ашигладаг болгохын төлөө ажиллахдаа түр хугацаанд хурдны хязгаарлалт тавих болно” гэж тэр мэдэгджээ.

Дараа нь Олтмэн техникийн ачааллын улмаас зураг үүсгэх зарим хүсэлтэд татгалзахаас өөр аргагүй болж байгааг мэдэгдэхдээ үүнийг “аль болох хурдан засварлах”-аа амласан байна.

Эх сурвалж: Business Insider