Төрийн тусгай алба хаагчид өдөрт дунджаар 12 цаг ажиллаж байгаа нь ажлаас халшрах, өвчлөх шалтгаан болж байна
Төрийн тусгай албан хаагчдын нэгдсэн эмнэлгийн 9 дэх удаагийн "Эрдмийн чуулган-2025" өнөөдөр боллоо.
Энэ үеэр төрийн тусгай алба хаагчдын нэгдсэн эмнэлгийн эмч нар Хууль зүй, дотоод хэргийн яамны харьяа бүх алба хаагчдын дунд хийсэн урьдчилан сэргийлэх үзлэгийн дүнг хиймэл оюун ухаанаар тооцоолж өвчлөлийн тэргүүлэх шалтгааныг гаргажээ. Мөн ажилласан жил, мэргэжлийн онцлог, бүс бүсийн онцлогтой харьцуулан дараагийн 10 жилд өвдөх магадлалтай өвчлөлийн прогнозыг гаргасан байна.
Улс орны үндэсний аюулгүй байдал, хууль сахиулах үүргийг гүйцэтгэх чиг үүрэг бүхий ХЗДХЯ-ны харьяа алба хаагчид: Хилийн цэрэг, Дотоодын цэрэг, Цагдаа, Шүүхийн шийдвэр гүйцэтгэх байгууллага, Шүүхийн шинжилгээ, Гадаадын иргэн харьяат, Улсын бүртгэл
Судалгаанд оролцсон алба хаагчдын 80-аас дээш хувь нь халдварт бус өвчний эрсдэлтэй гарсан байжээ. Үүн дотор хамгийн их эрсдэлтэй өвчин нь зүрх судасны болон хоол боловсруулах замын эмгэгийн эрсдэл байгаа аж. Төрийн тусгай алба хаагчдын нэгдсэн эмнэлэгт эмчлүүлэхээр ирдэг өвчтөнүүдийн дийлэнх нь тус шалтгаант өвчнөөр өвдөж, эмчлүүлдэг гэдгийг Ахлах дэслэгч Төрийн тусгай алба хаагчдын нэгдсэн эмнэлгийн Эрүүл мэндийг дэмжих, урьдчилан сэргийлэх төвийн эрхлэгч Б.Буянжаргал онцлов.
Хиймэл оюун ухаан төрийн тусгай алба хаагчдын дунд ирэх 10 жилд зүрхний цус хомсрох өвчин болон зүрхний дутагдал зонхилон тохиолдоно гэж тооцоолсон байна.
25-35 насны алба хаагчдын дунд өвчлөл их байна
Түүнчлэн дөнгөж их сургуулиа төгсөөд 5-10 жил ажиллаж байгаа 25-35 насныхан дунд өвчлөл их гарсан байна. Мөн 10 жилийн дараа ч өвдөх эрсдэл нь өндөр гарчээ. Ид ажлын өндөр чадамжтай байгаа үедээ алба хаагчид өвчилж байгааг эмч онцлов.
Тус насныхан нь ажлын ачааллыг нуруун дээрээ үүрч гүйцэтгэх ажлыг хийж байгаагаас гадна маш их илүү цагаар ажилладаг нь өвчлөхөд нөлөөлж байгаа аж. Тухайлбал алба хаагчид өдөрт дунджаар 12 цаг ажиллаж байна гэж тус судалгаагаар гарчээ. Түүнчлэн гэнэтийн үүргүүд буюу цастай, бороотой ямар ч үед үүрэг аваад ажил үүргээ гүйцэлдүүлэх болдог, томилолтоор удаан хугацаагаар явж байгаа зэрэг нь өвчлөлийн эрсдэлийг улам нэмэгдүүлж байгаа аж.
Алба хаагчдын 60-аас дээш хувь нь ажлаас халшрах хам шинжтэй байна
Эрт илрүүлгийн үеэр мөн сэтгэлзүйч ажиллаж алба хаагчдын стрессийн түвшнийг тодорхойлоход алба хаагчдын 60-аас дээш хувь нь ажлаас халшрах хам шинжтэй байжээ. Мөн нойргүйдсэн, сэтгэл түгшилт, гутралттай байсан нь төрийн тусгай алба хаагчдын ажлын ачаалал, илүү цаг зэргээс үүдэн гарч буй сэтгэлзүйн асуудалд онцгой анхаарах шаардлагатай болсон нь ажиглагдсан байна.
Өвчлөлийг насны бүлгээр авч үзэхэд:
- 25-30 насны хүмүүст хүчдэлийн толгой өвдөлт,
- 31-35 насны хүмүүст зүрхний хэм алдагдал,
- 36-40 насны хүмүүст артерийн даралт ихсэлт,
- 46-аас дээш насныханд нойр булчирхайн архаг үрэвсэл болон артерийн даралт ихсэлтийн тохиолдол их байна
Хиймэл оюун ухааны дата анализыг дүгнэхэд төрийн тусгай албан хаагчдад хамгийн их нөлөөлж буй эрсдэлт хүчин зүйлд зүрх судасны бүлэг эрсдэл үүнээс тамхидалт, ажлын хэт ачаалал, стресс байгаа нь үндсэн дата анализтай дүйж байна.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
Баярлалаа
|
36 СЭТГЭГДЭЛТЭЙ
|
