ФОТО: "Огцрох амархан" жагсаал 16 дахь өдрөө үргэлжилж байна
Ерөнхий сайд Л.Оюун-Эрдэнийг огцруулах зорилго бүхий "Огцрох амархан" жагсаал 16 дахь өдрөө үргэлжилж байна.
Өчигдөр тус жагсаалыг зохион байгуулагчид УИХ-ын дарга Д.Амарбаясгалан, УИХ-ын гишүүн Ардчилсан намын дарга Л.Гантөмөр, УИХ дахь Ардчилсан намын бүлгийн дарга О.Цогтгэрэл нарт 24 цагийн дотор жагсаалын төлөөллийг хүлээн авч уулзах шаардлага хүргүүлсэн.
Энэ дагуу өнөөдөр
- Улсын Их Хурлын Дарга Д.Амарбаясгалан,
- Төрийн байгуулалтын байнгын хорооны дарга Ж.Бат-Эрдэнэ,
- УИХ-ын гишүүн, МАН-ын төлөөлөл П.Сайнзориг гишүүн,
- УИХ-ын гишүүн, АН-ын төлөөлөл Б.Жаргалан гишүүн,
- УИХ-ын гишүүн, ХҮН-ийн төлөөлөл Г.Уянгахишиг,
- УИХ-ын гишүүн, ИЗНН-ийн төлөөлөл Б.Батбаатар,
- УИХ-ын гишүүн, Үндэсний Эвслийн төлөөлөл Д.Пүрэвдаваа,
- УИХ-ын Ерөнхий Нарийн бичгийн Дарга Б.Баасандорж нар жагсагчдын төлөөллийг хүлээн авч уулзав.
Тодорхойлсон 3 шаардлагын хүрээнд товлосон уг уулзалтаар дараах байр суурийг УИХ-ын Дарга болон гишүүд илэрхийллээ.
- Залуусын тайван замаар эвлэлдэн нэгдэж байгаа жагсаалыг ихэд үнэлж, хүндэтгэж байна. Та бүхний шаардлагыг чих тавин сонсож байгаа,
- 126 гишүүнтэй болж өргөжсөн Улсын Их Хурал хариуцлагатай, ёс зүйтэй, ил тод улс төрийн соёлыг бэхжүүлэхээр ажиллаж байна. Улс төрийн намуудын үзэл баримтлалаас үл хамааран зарчмын асуудлууд дээрээ нэгдмэл буй,
- Үүсээд буй асуудлыг Парламент зохих үйл явцын дагуу шийдвэрлэнэ. Шийдвэрлэх явцдаа Үндсэн Хуулийг дээдэлнэ. Даваа гарагт Төрийн Байгуулалтын Байнгын Хороогоор ороод, ирэх Пүрэв гарагийн нэгдсэн хуралдаанаар хэлэлцэх төлөвлөгөөтэй,
- Зөвхөн Засгийн Газраас өргөн барьсан тогтоолын төслийн хүрээнд хязгаарлалгүйгээр Улсын Их Хурлын бүх гишүүд нээлттэй асуулт асууж, тодруулга авна. Иймд жагсагчдын тодруулмаар байгаа асуултуудыг ч гишүүд бүх талаас нь илэрхийлнэ,
- Асуудлыг зөв шийдэх дээр хичээнгүйлэн ажиллаж буй тул иргэдийг Парламентад итгэх итгэлээ алдахгүй байхыг уриаллаа.
Уг уулзалт 16:30 цагт товлосон тул өнөөдөр "Огцрох амархан" жагсаал 18:00 цагаас 21:30 цаг хүртэл үргэлжилж байна.
Жагсаал "Ууртай микрофон" хөтөлбөрөөр нээлтээ хийсний дараа УИХ, намуудын төлөөлөлтэй уулзсан иргэд тайлангаа танилцуулсан юм. Түүнчлэн сөрөг жагсагчдын микрофон нээсэн тул Ерөнхий сайд Л.Оюун-Эрдэнийг дэмжигчдийг индэр дээр урьжээ.
ФОТО
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
