Boogii: Ice Top хамтлаг хоёр найзыгаа хүндэтгээд "In Da Huree" тоглолтод таван дуу дуулна
Хип хоп урсгалын томоохон төлөөлөгчид болох Desant, Ginjin, Ice Top хамтлагийн Boogii нарын хамтарсан "In Da Huree" тоглолт энэ долоо хоногийн Бямба гарагт (2025.05.10) SocialPay Park-д зохион байгуулагдах гэж байна.
Үүнтэй холбогдуулан уран бүтээлчид болон зохион байгуулагчдын зүгээс өнөөдөр хэвлэлийн хурал зарлаж, тоглолтын талаар дэлгэрэнгүй мэдээлэл өглөө.
Ерөнхий найруулагч н.Энхбаатар: "In Da Huree" тоглолт маань Desant, Ginjin, Boogii гэсэн дарааллаар явна. Хамгийн сүүлд нь гурван уран бүтээлчийн нийлмэл гэж нийтдээ долоон бүлэгт хуваасан. Энэ дунд нь зочин уран бүтээлчид тоглолтын нэг хэсэг болж оролцоно. Халаалтын дуучин гэж байхгүй. Нийтдээ дөрвөн цаг, 30 минутын тоглолт болно. Хэт сунжруулахгүй, цагтаа эхлээд цагтаа дуусахаар төлөвлөсөн байгаа.
Энэ тоглолт бол миний анхны найруулга. Өмнө нь тоглолтуудын лед дээр ажилладаг байсан. Энэ зуны анхны тоглолт учраас 45 градусын налуутай лед засна. Учир нь дуучдыг үзэгчидтэй ойрхон байлгах үүднээс 45 градусын налуу засаж байгаа. Одоогоор ледийг налуу зассан тоглолт болж байгаагүй.
Boogii, Desant, Ginjin нартай хамтарч дуу бүтээсэн уран бүтээлчид зочноор ирж байгаа. Тухайлбал ICE TOP, DIGITAL, DI BATUKA, BABAR, TSETSE, KA, JASON, MRS M, LIMIT KING, FLA, VANDEBO, BLU, SHUWU, YOUNGSUB, HARANGA / LHAGVASUREN нар хүрэлцэн ирнэ.
Boogii: Саяхан Ice Top хамтлаг ахлагчаа алдлаа. Ер нь би энэ тоглолтод оролцохгүй гэж байсан. Гэвч хамтлагийнхан болон ар гэрийн зүгээс харин ч тогло, ахлагчдаа зориулсан номер гаргаж тоглооч гэсэн. Тиймээс манай хамтлаг шийдвэр гаргаж, хоёр найзыгаа хүндэтгээд тоглохоор болсон. Манай хамтлаг таван дуу дуулна. Би дуунуудаа амьд хөгжимтэй дуулахаар төлөвлөсөн.
Тоглолтын нэрийг Улаанбаатартай холбогдуулж өгсөн. Мөн наймдугаар сарын 8-нд Ice Top хамтлагаараа тоглох гэж байгаа гэдгийг хэлье.
Ginjin: Тоглолтын бэлтгэл маш сайн байгаа. Том заалд бэлтгэлээ хийж болохоор дугаралтаа сайн бэлдсэн. Би хоёр дахь цомог дээрээ Монголын уламжлалт хөгжмийн зэмсгийг ашиглаж байна. Бид гурвын гаргасан In Da Huree дуунд морин хуурыг ашигласан. Гадаадад бидний хэлийг ойлгохгүй ч гэсэн хөгжмөөр дамжуулж монголчуудыг таниулбал гэж бодож эхэлсэн. Орчин үеийн ямар ч дуу байсан гэсэн уламжлалт хөгжмийн зэмсгийг ашиглана.
Монголын хип хоп дуучид ерөнхийдөө стадионы задгай фестиваль, оройн цагаар бааранд гэсэн хоёр газарт дуулж байгаа. Насан хүрээгүй хүүхдийг бааранд оруулахгүй. Тиймээс насанд хүрээгүй хүүхдийг харгалзах хүнтэй нь үзүүлэхээр тохирсон байгаа.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
Баярлалаа
|
29 СЭТГЭГДЭЛТЭЙ
|
