Э.Мөнхболд: Гарын үсэг хуурамчаар үйлдэж, бусдын өмчлөх эрхийг зөрчвөл эрүүгийн хариуцлага хүлээлгэнэ

Гэрэл зургийг MPA агентлагийн онцгой зөвшөөрөлтэйгөөр ашиглав

Хуурамч баримт бичиг үйлдэх, ашиглах гэмт хэргээс сэргийлэх шаардлагатай байгааг Улсын Ерөнхий Прокурорын Газар (УЕПГ)-аас анхаарууллаа. 

Монгол Улсын Үндсэн хуулийн 16 дугаар зүйлийн 16.3-т хөдлөх, үл хөдлөх хөрөнгө шударгаар олж авах, эзэмших, өмчлөх, өв залгамжлуулах эрхтэй гэж заасан байдаг.

Гэвч хэд хэдэн эзэмшигчтэй хөдлөх болон үл хөдлөх хөрөнгийн нэг эзэмшигч нь өөртөө давуу байдал олгох зорилгоор нөгөө эзэмшигчдээ мэдэгдэлгүй гарын үсгийг нь хуурамчаар үйлдэж, улмаар улсын бүртгэлд бүртгүүлсэн гэмт хэрэг гарчээ. 

Ингэхдээ "Баримт бичиг бүрдүүлэхэд зөвлөгөө өгнө" гэсэн хувь хүмүүст хандаж, бусдаар бичиг баримт хуурамчаар үйлдүүлж байгаа нь Эрүүгийн хуулийн 23.2 дугаар зүйлд заасанчлан хуурамч баримт бичиг үйлдэх, ашиглах гэмт хэрэгт тооцогдоно.

Сүхбаатар дүүргийн прокурорын газрын хяналтын прокурор Э.Мөнхболд "Сүхбаатар дүүргийн нутаг дэвсгэрт Улсын Бүртгэлийн Ерөнхий Газар үйл ажиллагаа явуулдаг. Үүнтэй холбоотойгоор хувь хүн, байгууллагаас өмчлөх эрх үүсгэх, өөрчлөх, захиран зарцуулахтай холбоотойгоор баримт бичиг гаргаж өгдөг.

Энэ тохиолдолд баримт бичгийг хуурамчаар үйлдэх гэмт хэрэг дийлэнх тохиолдолд үйлдэгддэг. Иргэдийн зүгээс мэргэжлийн байгууллагад хандаж зөвлөгөө авдаггүй. 

Энэ тохиолдолд хуурамч бичиг баримт үйлдсэн хувь хүн, хувьцаа эзэмшигч бүгд эрүүгийн хариуцлага хүлээдэг зохицуулалттай. Энэ төрлийн гэмт хэрэгт холбогдвол ямар сөрөг үр дагавар бий болдог вэ? 

• Үндсэн хуульд заасан өмчлөх эрх зөрчих
• Байгууллагын хэвийн үйл ажиллагаа алдагдах
• Иргэд эрүүл мэнд, сэтгэл санаагаар хохирох сөрөг үр дагавартай.

Иргэд хооронд үүссэн маргааныг хуулийн дагуу шийдвэрлүүлээгүй байхад өөрийн ашиг сонирхлын үүднээс хэн нэгэн этгээдээр дамжуулан хуурамч бичиг баримт гаргаж өгч, бусдын өмчлөх эзэмших эрхийг шилжүүлэн авах нь энэ төрлийн гэмт хэрэгт холбогдох үндэслэл болдог" гэлээ. 

ВИДЕО: