Гал зогсоох яриа хэлэлцээ нь урагшгүй байгаагийн улмаас Путинд маш их уурлаж байгаагаа Трамп мэдэгдэв

Ням гарагт NBC сувагт өгсөн ярилцлагадаа АНУ-ын ерөнхийлөгч Дональд Трамп гал зогсоох яриа хэлэлцээ нь урагшлахгүй байгаагийн улмаас ОХУ-ын ерөнхийлөгч Владимир Путинд “маш их уурлаж” байгаагаа хэлжээ.

Энэ шалтгаанаар тэр Оросын газрын тосыг худалдан авч байгаа улс орнуудад импортын 50 хувийн татвар оноохоор сүрдүүлсэн байна.

Өөрөөр хэлбэл Оросын газрын тосыг худалдан авдаг орнуудын АНУ-д импортлогддог бараа бүтээгдэхүүнд 50 хувийн татвар оноох тухай юм. Одоогоор Оросын газрын тосны хамгийн том худалдан авагчид нь Хятад, Энэтхэг улсууд байгаа билээ.

“Хэрвээ Украинд цус урсгах явдлыг зогсоох талаар Оростой тохиролцоонд хүрч чадахгүй бол, хэрвээ үүнд Орос улс буруутай гэж үзвэл би Оросоос гарах бүх газрын тосонд хоёрдогч татвар онооно” гэж Трамп энэ үеэр хэлжээ.

Трампын мэдэгдлийн талаар Цагаан ордон ямар нэг тайлбар өгөөгүй байна.

Өнгөрсөн зургаан долоо хоногийн хугацаанд Трамп голдуу Украины талыг шахаж, Киевийн эрх баригчдыг дайнаа зогсоох хүчин чармайлт гаргахгүй байгааг нь шүүмжилж байв.

Үүний хажуугаар тэр Путинд зусардаж, Оросын ерөнхийлөгчийн тавьсан шаардлагад үндсэндээ бууж өгөөд байлаа.

Харин өчигдрийн мэдэгдэл нь анх удаа Путин болон Оросын талыг дайны галыг зогсоох үйл явцад саад учруулсанд буруутгасан тохиолдол байв.

NBC News сувагт утсаар ярилцлага өгөхдөө тэр Украины ерөнхийлөгч Володимир Зеленскийг төрийн эрхээс зайлуулах санаа гаргах болсон Путинийг шүүмжилсэн байна.

Өнгөрсөн долоо хоногт Путин ярихдаа Зеленскийг огцруулж, Украинд НҮБ-ын оролцоотой түр засгийн газар байгуулсны дараа сонгууль явуулах санал гаргасан юм.

“Зеленскийн хууль ёсны статуст халдаж эхэлсний дараа би Путинд маш их уурлаж бухимдсан гэж хэлэхэд болно. Учир нь энэ бол зөв байр суурь биш юм. Шинэ засгийн газар байгуулах гэдэг нь яриа хэлэлцээ сунжирна гэсэн үг” гэж Трамп хэлжээ.

Энэ ярилцлагынхаа үеэр Трамп бас хэдийгээр үндсэн хуулиар хориглодог ч АНУ-ын ерөнхийлөгчөөр гурав дахь удаагаа сонгогдох талаар нухацтай бодож байгаагаа илэрхийлсэн юм.

“Олон хүн намайг ингээсэй гэж хүсэж байгаа. Гэхдээ би тэдгээр хүмүүст бидний өмнө урт зам байгааг хэлье” гэж Трамп энэ талаар мэдэгджээ.

Трампын ярилцлага цацагдсаны дараа Зеленский “Орос улс энэ дайныг цааш нь сунгах шалтаг хайсаар байна” гэж сошиал хуудсандаа бичсэн байна.

Эх сурвалж: BBC