Дэлхийн хоёр дахь баян хүн хуримдаа зориулан хотынх нь томоохон хэсгийг хаах гэж байгааг Венецийн захиргаа няцаав

Амазон компанийн үүсгэн байгуулагч, дэлхийн хоёр дахь тэргүүн баян Жэф Безос энэ оны зургаадугаар сарын сүүлээр Италийн үзэсгэлэнт хотуудын нэг Венецийн ихэнх хэсгийг хааж, хуримаа хийх гэж байгаа тухай мэдээ цацагдаад байна.

Тэрбээр 2019 онд анхны гэргийгээсээ салсны дараа хамтран амьдрах болсон сэтгүүлч Лорен Санчестай гэрлэх гэж байгаа юм.

Арван жилийн өмнө Венец хотод Холливүүдийн од Жорж Клүүни, хуульч Амал Аламуддин нар хуримлаж байв.

Италийн нэг сонин Безосын хурим гурван өдөр дараалан үргэлжилж, өдөр бүр 250 зочин авах тухай мэдээлсэн юм. Зочдын дунд АНУ-ын ерөнхийлөгч Дональд Трамп байгааг бас мэдээлжээ.

Сонины мэдээнд бас Безос таван том зочид буудлыг бүтнээр нь захиалсан, Венецийн сувгуудаар хүн тээвэрлэдэг гондола буюу усны таксинуудыг бүхлээр нь хөлсөлсөн талаар дурдсан байна.

Харин Венец хотын захиргаа Бямба гарагт гаргасан мэдэгдэлдээ энэ мэдээллийг няцаажээ.

 

“Жэф Безосын хуримын талаарх олон таамаг, мэдээлэл нь огт үндэслэлгүй юм. Хуримд зөвхөн 200 зочин уригдсан тул Венец хот, хотын оршин суугчид, жуулчдад ямар ч саад учруулахгүйгээр зохион байгуулагдах боломжтой. Хуримыг зохион байгуулагчид гондолагийн флотыг бүхлээр нь захиалаагүй. Хотын амьдрал хэвийн үргэлжлэх болно” гэж уг мэдэгдэлд өгүүлсэн байна.

Венец хот улс төрийн дээд хэмжээний уулзалтууд, кино наадам, хувцас загварын шоу, бизнесийн томоохон арга хэмжээнүүдийг зохион байгуулж байсан туршлагатайг бас дурджээ.

Венецийн захирагч Луижи Брунаро хотод нь хуримлахаар сонгосонд талархал илэрхийлээд энэ арга хэмжээ нь сая сая долларын эдийн засгийн нөлөө үзүүлэхийг “Corriere della Sera” сонинд өгсөн ярилцлагадаа онцолсон байна.

“Хотын эмзэг байдал, давтагдашгүй онцлогт сөрөг нөлөөгүй байх тал дээр бид зохион байгуулагчидтай хамтран ажиллаж байна. Венецэд хайртай хэн бүхнийг бид баяртай угтан авах болно” гэж Брунаро ярьжээ.

Эх сурвалж: AFP