Гринландад зохион байгуулах айлчлалынхаа цар хүрээг хумьсан АНУ-ын шийдвэрийг Дани улс талархан хүлээж авав

Ойрын өдрүүдэд Трампын засаг захиргаа өндөр албаны хүмүүсээс бүрдсэн төлөөлөгчдийг Дани улсын харьяанд өөртөө засах эрхтэй оршдог дэлхийн хамгийн том арал Гринландад илгээхээр төлөвлөж байсан юм.

Айлчлалын бүрэлдэхүүнд АНУ-ын дэд ерөнхийлөгчийн гэргий Уша Вэнс, Цагаан ордны үндэсний аюулгүй байдлын зөвлөх Майк Уолц нар багтаж, Гринландын ард иргэдийн уламжлалт ахуй соёлтой танилцах төлөвлөгөөтэй байв.

Гэвч Гринланд арал болон Дани улсын эрх баригчдын хүчтэй эсэргүүцлийн улмаас Трампын засаг захиргаа энэхүү айлчлалынхаа цар хүрээг хумих шийдвэрийг гаргажээ.

Тухайлбал төлөөлөгчид Гринландын нийслэлд зочлохгүй, ард иргэдтэй нь уулзахгүй, зөвхөн тэнд байрладаг АНУ-ын цэргийн баазад зочлохоор болсон байна.

Бас үндэсний аюулгүй байдлын зөвлөх Майк Уолцын нэр айлчлалын бүрэлдэхүүнээс хасагджээ. Харин дэд ерөнхийлөгч Жэй Ди Вэнс айлчлалын бүрэлдэхүүнд нэмэгдэж, гэргийтэйгээ цуг аялах шийдвэрээ зарласан юм.

“Америкчууд Гринландын олон нийттэй уулзах төлөвлөгөөгөө цуцалсан нь үнэхээр эерэг зүйл болсон гэж би бодож байна. Тэд зөвхөн өөрийн Питуффик баазад зочлох болно. Бид үүнийг эсэргүүцэхгүй” гэж Данийн гадаад хэргийн сайд Ларс Локке Расмуссен өчигдөр хэвлэлд ярьсан байна.

57,000 орчим оршин суугчтай Гринланд арал Дани улсын харьяанд өөртөө засах эрхтэй оршдог. Арлын гадаад харилцаа, аюулгүй байдлын асуудлыг Копенхагенд шийддэг.

Мягмар гарагт Дани улсын ерөнхий сайд Метте Фредериксен АНУ-ын айлчлалыг “хүлээн зөвшөөрөх аргагүй дарамт шахалт” хэмээн тодорхойлж, хэрэгжүүлбэл хүчтэй эсэргүүцэхээ амлаж байсан юм.

Ерөнхийлөгч Дональд Трамп бүр өмнөх бүрэн эрхийнхээ хугацаанд Гринланд арлыг АНУ-ын бүрэлдэхүүнд авах санааг анх гаргаж байв.

Тухайн үед тэр арлыг Дани улсаас худалдаж авах тухай ярьдаг байсан бол одоо ямар ч хамаагүй аргаар нэгтгэхээр сүрдүүлдэг болсон.

Тэрбээр стратегийн ач холбогдол нь улам бүр нэмэгдэж байгаа Гринландыг АНУ-ын төдийгүй дэлхий дахины аюулгүй байдалд онцгой газар нутаг гэж үзэж байгаа.

Бас Гринланд арал нь асар их хэмжээний эрдэс баялагтай газар юм.

Дани болон Гринландын эрх баригчид газар нутгаа АНУ-д өгөхийн оронд илүү нягт холбоотны харилцааг хөгжүүлэх сонирхлоо илэрхийлдэг.

Эх сурвалж: The Guardian