Орос-Украины уулзалтыг зохион байгуулахад Ватикан тохиромжгүй газар болохыг Лавров хэлэв

Шашин шүтлэгийн хувьд өөр Орос, Украин улсууд Ватиканд уулзах нь тохиромжгүйг ОХУ-ын гадаад хэргийн сайд Сергей Лавров өчигдөр хэлжээ.

Италийн ерөнхий сайд Жоржа Мелонитой өнгөрсөн Мягмар гарагт утсаар ярих үеэрээ Ромын католик сүм хийдийн шинэ тэргүүн Орос, Украины уулзалтыг Ватиканд зохион байгуулах хүсэлтэй байгаагаа илэрхийлсэн юм.

Тэгвэл өчигдөр Москвагийн Дипломат Академид үг хэлэхдээ Лавров “Олон хүмүүс хэзээ, хаана уулзалт болох талаар янз бүрээр төсөөлцгөөж байна. Одоогоор бидэнд энэ талаар ямар ч санаа алга. Гэхдээ Ватиканыг хэлэлцээ хийх газар гээд төсөөлөөд үз дээ. Үнэн алдартны шашинтай орнууд мөргөлдөөнийхөө үндсэн шалтгааныг хэрхэн арилгах талаар хэлэлцэхийн тулд католик шашны платформ ашиглах нь арай л зохисгүй хэрэг. Үнэн алдартны шашинтай хоёр орны төлөөлөгчдийг хүлээн авах нь Ватиканд ч таатай биш байх болов уу гэж би бодож байна” гэж хэлжээ.

Энэ сарын эхээр дайтагч хоёр улсын төлөөлөгчид Туркийн Истанбул хотод шууд яриа хэлэлцээнд орсон нь сүүлийн гурван жил гаруй хугацаанд болсон анхны уулзалт байлаа.

Өчигдөр Лавров бас Украин дахь орос хэлтэй хүмүүсийг ерөнхийлөгч Володимир Зеленскийн тэргүүлсэн “хунт”-ын дэглэм дор байлгахыг зөвшөөрөхгүйгээ мэдэгджээ.

Киевийн эрх баригчид өөрийн орос хэлтэй хүн амыг хавчин гадуурхдагаа үгүйсгэдэг.

Истанбулын уулзалтаас гарсан гол үр дүн нь талууд харилцан 1,000 олзны цэрэг солилцохоор болсон юм.

Энэ тохиролцоо өчигдөр буюу Баасан гарагт хэрэгжиж эхэлсэн байна. Тухайлбал өчигдөр Орос, Украины талууд эхний ээлжийн 390 олзны цэрэг, энгийн иргэнийг харилцан солилцсон нь 2022 оны хоёрдугаар сард дайн эхэлснээс хойших хамгийн том ийм арга хэмжээ болжээ.

Солилцох ажиллагаа Беларусь улстай залгаа Украины хил дээр зохион байгуулагдсан байна.

Эх сурвалж: Reuters