Хятадын цахилгаан автомашины зах зээл өнгөрсөн сард 76 хувиар өссөн ч Теслагийн борлуулалт 50 хувиар буурав

Өнгөрсөн хоёрдугаар сард дэлхий даяар цахилгаан болон хосолсон (хайбрид) хөдөлгүүртэй автомашины борлуулалт жилийн өмнөх мөн үеэс 50 хувиар өсөж, 1.2 сая ширхэгт хүрснийг Rho Motion зах зээлийн судалгааны байгууллага өчигдөр зарлажээ.

Хятадын зах зээлийн 76 хувийн өсөлт үүнд голлон нөлөөлсөн байна. Өнгөрсөн сард дэлхий даяар борлогдсон цахилгаан хөдөлгүүрт автомашины дөрөвний гурав очим нь Хятадын зах зээлд оногджээ.

Хятадын BYD компани 2023 оны дөрөвдүгээр улиралд АНУ-ын Теслаг гүйцэж, бүрэн цахилгаан хөдөлгүүрт автомашины дэлхийн хамгийн том үйлдвэрлэгч болж байв.

Энэ оны эхний хоёр сард тус компани цахилгаан болон хосолсон хөдөлгүүрт нийт 133,361 ширхэг автомашин борлуулжээ.

Үүнээс гадаадад экспортолсон цахилгаан хөдөлгүүрт автомашины тоо нь хоёрдугаар сард 67,025 хүрч, жилийн өмнөхөөс хоёр дахин өсөж, сүүлийн гурван сар дараалан дээд амжилт тогтоосон байна.

Харьцуулбал хоёрдугаар сард Тесла компани Хятадын зах зээлд 30,688 ширхэг автомашин борлуулсан нь жилийн өмнөх мөн үеэс 50 гаруй хувийн бууралт болжээ.

Энэ оны нэгдүгээр сард өмнөх оны нэгдүгээр сартай харьцуулахад 49.2 хувиар борлуулалт нь буурсан юм. Өөрөөр хэлбэл хоёрдугаар сарын бууралт нь өмнөх сараасаа хурдассан байна.

АНУ, Европын эрх баригчид зах зээлээ хамгаалахын тулд Хятадын цахилгаан автомашинд импортын өндөр босго тавьсан ч ийм үр дүн үзүүлжээ.

Тухайлбал Европын Холбоо өнгөрсөн оны аравдугаар сард Хятадад үйлдвэрлэсэн автомашинуудад дээд тал нь 35 гаруй хувийн импортын татвар оноосон бол АНУ, Канадын засгийн газрууд 100 хувийн татвар оноосон.

АНУ-ын ерөнхийлөгч Дональд Трамп үүнийг илүү өсгөхөөр сүрдүүлж байгаа.

“Өндөр татварыг үл харгалзан BYD компанийн дотоод болон гадаад зах зээлийн тэлэлт удаашрах шинжгүй байна” гэж Rho Motion компанийн өгөгдлийн менежэр Чарльз Лестер хэлжээ.

Хятад улс одоогоор цахилгаан автомашины нийлүүлэлтийн сүлжээнд ноёрхож, дэлхийн батарейн зах зээлийн дөрөвний гурвыг хангаж байгаа.

Цахилгаан автомашин угсрахад шаардлагатай бусад бүх эд ангийн гуравны хоёрыг Хятадын үйлдвэрлэгчид хангадаг болжээ.

Энэ оны эхний хоёр сарын хугацаанд Европын зах зээлд 500,000 цахилгаан автомашин зарагдсан нь жилийн өмнөхөөс 20 хувиар өссөн үзүүлэлт болсон байна. Умард Америкийн зах зээлд ижил хугацаанд мөн 20 хувиар өсөж, 300,000 ширхэг зарагджээ.

Эх сурвалж: South China Morning Post