300 орчим өвчтөнөө хүчирхийлсэн мэс заслын эмчийн шүүх хурал Франц улсад эхэлжээ

Бараг 300 өвчтөнөө ухаангүй болон биеэ хамгаалах чадваргүй байх үед нь хүчиндсэн мэс заслын эмчийн шүүх хурал Даваа гарагт Франц улсад эхэлжээ.

74 настай шүүгдэгч Жоэл Ле Скуарнек дөрвөн хүүхдийг хүчирхийлсэн хэргийнхээ 2020 онд сонссон ялыг одоо шоронд эдэлж байгаа юм.

Өчигдөр эхэлсэн хурал нь 1989-2014 онуудад мэс заслын дараа хүчиндүүлсэн, бэлгийн халдлагын хохирогч болсон 299 өвчтөний хэргийг шүүх зорилготой.

Тэдгээрийн 256 нь хохирогч болохдоо 15 нас хүрээгүй байжээ. Хохирогчдын хамгийн залуу нь нэг настай, хамгийн ахмад нь 70 настай байсан байна.

Ердөө хоёр сарын өмнө олон жилийн турш эхнэрээ өндөр тунтай эмийн тусламжтай мансууруулаад бусдад хүчиндүүлдэг байсан Доминик Пеликотын шүүх хурал Францын нийгмийг доргиож байсан юм.

Пеликоттой адил Ле Скуарнек нь хохирогчдын нэр, нас, хаяг, яаж хүчирхийлүүлсэн зэргийг тэмдэглэж, гэмт хэргээ баримтжуулдаг байжээ.

Ле Скуарнекийн шүүх хурал нээлттэй зохион байгуулагдах бол долоо хоног үргэлжлэх хохирогчдын мэдүүлгийг сонсох үйл ажиллагаа хаалттай горимд явагдах юм байна.

 

Хэрвээ шүүх буруутайг нь тогтоовол тэр 20 хүртэл жилийн хорих ял сонсоно. Францын хуулиар нэгж ялын хугацааг хохирогчийн тоогоор үржүүлдэггүй.

“Нэг хүн маш олон хүнийг хохироосон гэдэг утгаараа ч тэр энэ бол гарцаагүй Францын түүхэнд хамгийн томд тооцогдох хүүхдийн эсрэг бэлгийн гэмт хэрэг юм” гэж шүүхийн албаны хүн ярьсныг Францын “Le Figaro” өдөр тутмын сонин уламжилжээ.

Хохирогчид болон хүүхдийн эрхийг хамгаалагчид энэ хэрэг нь Францын хууль эрх зүйн тогтолцооны цоорхой, дутагдалтай талыг харуулж байгааг онцолж байна.

Тухайлбал Ле Скуарнек 2005 онд хүүхдийн садар самуун зураг хадгалж байсан хэргээр шийтгүүлсэн ч дараа нь тэтгэвэрт гарах хүртлээ олон жил ажиллаж байжээ.

2004 онд АНУ-ын Холбооны Мөрдөх Товчоо энэ талаар баримтыг Францын талд дамжуулснаар хэрэг илэрч байсан гэнэ.

Энэ хэргийнхээ төлөө тэр дөрвөн сарын хорих ял сонсож байжээ.

Дараа нь тэр өөр хотод шилжихэд эмнэлгийн удирдлага гэмт хэргийн түүхийг мэдэж байсан ч ажилд авч байсан байна.

Ле Скуарнек энэ мэтээр хоёр хотын эмнэлэг дамжин ажиллаад 2017 онд тэтгэвэртээ гарч байжээ.

Дуулиант шүүх хурлыг сурвалжлахаар 60 гаруй хэвлэл мэдээллийн байгууллагын 260 гаруй ажилтан өчигдөр Францын баруун бүсийн Ван хотод цугларсан юм. Шүүхийн шийдвэр зургаадугаар сарын эхээр гарах төлөвтэй байна.

Эх сурвалж: AFP